विजय पाटील, सांगली

सांगलीमध्ये वैद्यकीय शिक्षण घेणाऱ्या तरुणीवर सामूहिक बलात्कार करण्यात आल्याची घटना घडली आहे. ड्रिंकमध्ये गुंगीचे औषध देऊन तिघांनी तरुणीसोबत हे भयंकर कृत्य केलं. या प्रकरणी सांगली पोलिसांनी तिघांविरोधात गुन्हा दाखल करत त्यांना अटक केली. या घटनेमुळे सांगली हादरली आहे.

मिळालेल्या माहितीनुसार, सांगलीमध्ये वैद्यकीय शिक्षण घेणाऱ्या एका तरूणीवर सामूहिक बलात्कार करण्यात आलाय. तिघांनी पीडित तरूणीला गुंगीचे ड्रिंक देऊन तिच्यावर बलात्कार केला. आरोपी आणि तरुणी एकाच वैद्यकीय महाविद्यालयामध्ये शिक्षण घेतात. या तरुणांनी चित्रपट पाहण्याच्या बहाण्याने तरुणीला आपल्या रूमवर नेऊन तिच्यावर बलात्कार केला.

या प्रकरणी विश्रामबाग पोलिसांनी संशयित ३ तरुणांना अटक केली आहे. अटक करण्यात आलेल्या पैकी दोघे आणि पीडित तरुणी हे शहरातल्या एका वैद्यकीय महाविद्यालयामध्ये तिसऱ्या वर्षात शिक्षण घेत होते. मंगळवारी पिडीत तरुणीला चित्रपट पाहण्याच्या बहाण्याने तिच्या २ मित्रांनी त्यांच्या रूमवर नेले. त्यानंतर तरुणीला ड्रिंकमध्ये गुंगीचे औषध देण्यात आले.

पीडित तरुणीला गुंगी आल्यानंतर आरोपी तरुणांनी दारू प्यायली. दारूच्या नशेत त्यांन आळीपाळीने तिच्यावर सामूहिक बलात्कार केला. या घटनेनंतर शुद्धीवर आलेल्या तरुणीने आपली सुटका करत थेट विश्रामबाग पोलिस ठाणे गाठले. तिने घडलेला प्रकार पोलिसांना सांगितला. तरुणीच्या तक्रारीनंतर पोलिसांनी या तिघांविरोधात गुन्हा दाखल केला. विश्रामबाग पोलिसांनी अवघ्या काही तासांत तिघांनाही अटक केली. पोलिस पुढील तपास करत आहेत.