Pune Crime News

मोबाईल चोरीचे अनेक किस्से तुम्ही ऐकला असाल. मात्र पुण्यात केलेल्या मोबाईल चोरीचं कारण ऐकून डोक्याला हात लावाल. पुण्यातील एका तरुणाने चक्क 'गर्लफ्रेंड'ला इंप्रेस करण्यासाठी मोबाईलची चोरी केली आहे आणि ही चोरी काही एक दोनवेळा केलेली नाही. दरम्यान पोलिसांनी दोघांना अटक केली असून त्यांच्याकडून तब्बल १५ मोबाईल जप्त केले आहेत.

अर्जुन महादेव शेलार (वय १८, रा. भिवरी, ता. पुरंदर) व प्रेम राजू शेलार (वय २०) अशी अटक केलेल्या मोबाईल चोरट्यांनी नावे आहेत. त्यांनी पुण्यातील वेगवेगळ्या भागातून हे मोबाईल चोरल्याचे समोर आले आहे. याप्रकरणी भारती विद्यापीठ पोलीस ठाण्यात गुन्हे दाखल करण्यात आले आहेत. या दोघांनी अजून कुठेकुठे मोबाईल किंवा इतर चोऱ्या केल्या आहेत का? याचा तपास पोलीस करत आहेत.('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

लुटमारीत मोबाईल पळवणे, रस्त्यावर मोबाईल हिसकावणे किंवा रहिवाशी भागातून मोबाईल चोरीच्या घटना सर्रास होत असतात. त्यामुळे पोलिसांकडून याची गंभीर दखल घेण्यात आली आहे. गुन्हे शाखा आणि स्थानिक पोलिसांकडून या प्रकरणांचा छडा लावला जात आहे. दरम्यान भारती विद्यापीठ पोलीस स्थानकाचे पोलीस गस्त घालत असताना त्यांना चोरीचे मोबाईल विक्रीसाठी दोघे चोरटे येणार असल्याची माहिती मिळाली होती. त्यानुसार सापळा रचून पोलिसांनी या दोघा मोबाईल चोरट्यांचा ताब्यात घेतले. त्यांची झडती घेतली असता त्यांच्याकडे तब्ब्ल १५ मोबाईल आढळून आले.

त्यांची चौकशी करताना त्यातील एकाने आपल्याला गर्लफ्रेंड आहे आणि तिला इम्प्रेस करण्यासाठी आपण मोबाईल चोरल्याचे सांगितले. त्यामुळे पोलिसांनीही डोक्याला हात लावला. गर्लफ्रेंडला भेटण्यासाठी गेल्यांनतर तो तिला वेगवेगळे मोबाईल दाखवत असे.