सचिन जाधव, पुणे

Pune Crime: पुण्यात हडपसरमधील हिंगणे मळा परिसरात कचऱ्यात पुठ्याच्या बॉक्समध्ये हात-पाय बांधलेल्या अवस्थेत एक मृतदेह सापडला होता. त्या मृतदेहाचे गुढ उकलण्यात पोलिसांना यश आले आहे. हात उसने घेतलेल्या पैशांवरून तरुणाचा खून करून त्याचा मृतदेह बॉक्समध्ये पॅक करून कचऱ्यात टाकून दिल्याचे समोर आले आहे. या प्रकरणी पोलिसांनी आरोपीला ताब्यात घेतले असून अधिक तपास सध्या सुरु आहे.

याबाबत सविस्तर माहिती अशी की, हात उसने घेतलेल्या पैशांवरून तरुणाचा खून करून मृतदेह बॉक्समध्ये पॅक करून कचऱ्यात टाकून दिल्याचा धक्कादायक प्रकार पुण्यामधून समोर आला आहे. या प्रकरणी हडपसर पोलिसांनी आरोपीला ताब्यात घेतले आहे. इम्रान यासीन पटेल (वय २४, रा. उंड्री) असे खून झालेल्या तरुणाचे नाव आहे. निजाम्मोद्दीन पटेल (वय २८) असे ताब्यात घेतलेल्या तरुणाचे नाव आहे. याप्रकरणी हडपसर पोलिसांत खूनाचा गुन्हा नोंद आहे

इम्रान पटेल तसेच निजाम्मोद्दीन दोघेही मुळचे कर्नाटकातील आहेत.पण निजाम्मोदीन गेल्या काही वर्षांपासून पुण्यात राहतो.तो फिल्टर दुरूस्ती तसेच विक्री व त्याचे स्पेअरपार्ट विक्री करतो. त्याचे स्वत:चे दुकान देखील आहे. तर इम्रान ४ वर्षापूर्वी पुण्यात आला होता. तो देखील निजाम्मोद्दीन सोबत दुरूस्ती व फिल्टर बसविण्याचे काम करत होता.

दोघांमध्ये एक लाखावरून वादावादी झाली होती. निजामने इम्रानला बहिणीच्या लग्नासाठी दीड वर्षांपुर्वी एक लाख रुपये दिले होते, आता इम्रान परत पैसे देत नव्हता. शुक्रवारी इम्रान निजामकडे गेला होता. तेव्हा त्यांच्यात पैशांवरून वादावादी झाली. वादानंतर त्यांच्यात भांडण झाले. मारहाणीत इम्रानचा मृत्यू झाला. इम्रान मयत झाल्याचे लक्षात आल्यानंतर निजाम घाबरला. त्याने मृतदेह पुठ्याच्या बॉक्समध्ये टाकून तो बॉक्स कचऱ्यात टाकला असल्याचे समोर आले.