सुप्रीम मस्कर, साम टिव्ही

आषाढी एकादशीनिमित्त लाखो वारकरी पंढरपूरच्या दिशेने विठ्ठलनामाचा गजर करत वाटचाल करतायेत. सगळ्यांनाचा विठुरायाच्या दर्शनाची आस आहे. वारकऱ्यांना जलद, सुलभ दर्शन व्हावं, त्यांचा वेळ वाचावा यासाठी विठ्ठल -रुख्मिणी मंदीर संस्थानने दर्शन पास सुविधा सुरु केली. मात्र पंढरपुरात बोगस दर्शन पासचा घोटाळा समोर आलाय. ज्ञानेश्वर महाराजांच्या पालखी सोहळ्यात सहभागी असलेल्या 7 भाविकांना मंदिर प्रवेशासाठी बनावट 'टोकन दर्शन' पास विकल्याची धक्कादायक घटना घ़डलीय. सासवड परिसरात या भाविकांकडून 100 रुपये घेऊन जुन्या पासवर नवीन डुप्लिकेट पास बनवून दिल्याचा प्रकार घडलाय. हिंगोलीच्या वसमतमधले हे वारकरी होते. पंढरपुरात हे वारकरी जेव्हा आले तेव्हा टोकन पास स्कॅन करताना हा धक्कादायक प्रकार समोर आला.

भाविकांची फसवणूक का होतेय?

वारीदरम्यान भाविकांना 10-12 तासांपर्यंत रांगेत थांबावं लागतं

टोकन प्रणालीमुळे अर्ध्या तासात थेट दर्शन

याचाच गैरफायदा घेत काही भामटे बनावट पास बनवून फसवणूक करतात

अधिकृत संकेतस्थळाऐवजी भामट्यांकडून पास विकत घेतल्यास फटका

मंदिराच्या अधिकृत संकेतस्थळावरूनच टोकन नोंदणी करण्याचं आवाहन

सहा जुलैला आषाढी एकादशी आहे. त्यानिमित्तानं राज्यभरातील भाविक, वारकरी विठ्ठल दर्शनासाठी पंढरपुरात येणार आहेत. त्यामुळे पांडुरंगाच्या दर्शनाचं बोगस रॅकेट उघड करण्याचे आव्हान पोलिसांसमोर आहे. अन्यथा 'देवा तुझ्या देवळात चोरट्यांचा फड' अशी भावना वारकऱ्यांच्या मनात निर्माण होईल.