जालना : राज्यात गुन्हेगारी थांबण्याचं नाव घेत नाहीय. अशीच एक धक्कादायक घटना जालन्यातून समोर आली आहे. चौथीही मुलगीच जन्माला आल्याने एका जन्मदात्या आई-वडिलांनीच एका महिन्याच्या चिमुकलीचा विहिरीत टाकून हत्या केल्याची धक्कादायक घटना उघडकीस आली आहे. ही माहिती पोलीस तपासात समोर आली आहे. सतीश पवार आणि पूजा पवार असं संशयित आरोपी आई-वडिलांचं नाव आहे.

जालन्यातील बदनापूर तालुक्यातील असरखेडा गावामध्ये १२ एप्रिल रोजी एका महिन्याच्या चिमुकलीचा मृतदेह विहिरीत आढळून आला होता. या घटनेमुळे परिसरात एकच खळबळ उडाली होती. पोलिसांनी घटनास्थळी जाऊन या चिमुकलीचा मृतदेह बाहेर काढल्यानंतर पोलिसांना घातपाताची शंका होती. पोलिसांनी तपासाची चक्रे फिरवली जिल्ह्यातील आशावर्करची मदत घेऊन पोलिसांनी हा गुन्हा उघडकीस आणला आहे. दरम्यान, पोलिसांनी आता संशयित आरोपी आई-वडिलांना अटक केली असून पुढील तपास पोलीस करत आहेत.

अल्पवयीन मुलाचं डोकं सिमेंटच्या नाल्यावर आदळलं

दरम्यान, गेल्या काही महिन्यांपासून बीडमधील गुन्हेगारीच्या घटनांमुळे संपूर्ण गावांमधील वातावरण ढवळून निघालं आहे. दिवसाढवळ्या बीडमध्ये हत्या, बंदुकीचा धाक दाखवून लूटमार, किरकोळ कारणावरून कोयत्याने वार, या कारणांमुळे बीड गुन्हेगारीच्या केंद्रस्थानी आलं आहे. अशातच बीडमध्ये आणखी एक धक्कादायक घटना घडली आहे.

चिकन विक्रीच्या किरकोळ वादातून एका अल्पवयीन मुलाची निर्घृण हत्या करण्यात आली आहे. मुलाला उचलून आधी सिमेंटच्या नाल्यावर आदळले. यातच त्याचा मृत्यू झाला आहे. घटनेनंतर आरोपी अल्पवयीन मुलगा घटनास्थळावरुन फरार झाला आहे. आरोपीचा शोध सध्या पोलीस घेत आहेत.