नाशिक : नाशिकमध्ये एका धक्कादायक घटनेनं खळबळ उडाली आहे. सुरगाणा तालुक्यातील मालगोंदा येथे एका पत्नीनं आपल्या पतीची कुऱ्हाडीने वार करून हत्या केली. इतकंच नाही, तर तिने त्याचे तुकडे करून ते घरातच पुरले. ही घटना उघडकीस आल्यानं परिसरात भीतीचं वातावरण पसरलं आहे. राजा रघुवंशी हत्या प्रकरणाची घटना ताजी असतानाच, ही घटना समोर आली आहे.

यशवंत मोहन ठाकरे असं हत्या झालेल्या व्यक्तीचं नाव आहे. ते सुरगाणा तालुक्यातील मालगोंदा येथील रहिवासी होते. त्यांच्या पत्नीनेच त्यांची हत्या केली. आपला मुलगा दोन महिन्यांपासून गुजरातमध्ये मजुरीसाठी गेला. तो अजूनही परत न आल्याने यशवंतच्या आई-वडिलांनी सुनेकडे विचारणा केली. मात्र, तिने उडवाउडवीची उत्तरे दिली. दरम्यान, सून स्वतः गुजरातच्या बिलीमोरा येथे निघून गेली. त्यामुळे घरच्यांना संशय आला. यशवंत परत न आल्यानं त्यांनी अधिक चौकशी करण्याचा प्रयत्न केला. पण काहीच पत्ता लागला नाही. अखेर, यशवंतच्या भावाची पत्नी प्रभाला भेटायला आली. त्यावेळी तिला काहीतरी संशयास्पद वाटलं. तिने ही गोष्ट आपल्या नवऱ्याला सांगितली आणि त्यानंतर हे प्रकरण उघडकीस आलं.

पोलिसांनी अधिक तपास केला, तेव्हा त्यांच्या पायाखालची जमीन सरकली. घराच्या शोषखड्ड्यात यशवंतचा मृतदेह आढळून आला. पोलिसांनी गोणीतील तुकडे असलेला मृतदेह ताब्यात घेतला. या प्रकरणी सुरगाणा पोलीस अधिक तपास करत आहेत. या घटनेमुळे परिसरात एकच खळबळ उडाली आहे. नाशिकमधून ही घटना समोर आल्याने आश्चर्य व्यक्त केले जात असून सदर महिलेने कोणत्या कारणातून आपल्या पतीची हत्या केली, याबाबत पोलीस अधिक तपास करत आहेत.