बंगळूरूमधून एक धक्कादायक प्रकार उघडकीस आला आहे. यामध्ये एका भाड्याच्या फ्लॅटमध्ये ३४ वर्षीय महिलेचा मृतदेह सापडला आहे. पोलिसांनी दिलेल्या माहितीनुसार, हा संपूर्ण रक्तबंबाळ झालेला मृतदेह नग्न अवस्थेत होता. त्याप्रमाणे, या महिलेची हत्या काही दिवसांपूर्वी झाल्याची शक्यता आहे. या घटनेमुळे संपूर्ण परिसरात खळबळ माजली आहे.

या मृत महिलेचे नाव पूजा दत्ता असे होते. पूजा ही झारखंडच्या धनबाद परिसरात राहणारी होती. तिने नुकतीच एका कंपनीतील नोकरी सोडली होती आणि ती सध्या बेरोजगार होती. मिळालेल्या माहितीनुसार, ती गेल्या ३ वर्षांपासून बंगळूरूच्या या भाड्याच्या घरात राहत होती.

नग्न अवस्थेत महिलेचा मृतदेह सापडला

हा मृतदेह काही दिवसांपासून या फ्लॅटमध्ये पडून होता. त्यामुळे आजूबाजूच्या लोकांना त्यातून दुर्गंध येऊ लागला. त्यावेळी त्यांनी पोलिसांना याची माहिती दिली. पोलिसांनी लगेच घटनास्थळी धाव घेत दरवाजा तोडून आतमध्ये प्रवेश केला. त्यावेळी त्यांना समोर या महिलेचा मृतदेह नग्न आणि रक्तबंबाळ अवस्थेत पडलेला दिसला.

पोलिसांनी दिलेल्या माहितीनुसार, या महिलेचा मृतदेह पूर्णपणे कुजला होता. त्या मृतदेहाची स्थिती पाहून महिलेचा मृत्यू जवळपास दोन ते तीन दिवसांपूर्वी झाला असावा, असा अंदाज आहे.

नुकतीच सोडली होती नोकरी

पोलिसांनी तिच्या घराची तपासणी केली असता, त्यांना एक पत्र सापडले. हे पत्र एका कंपनीचे असल्याचा अंदाज आहे. घटनास्थळी पोलिसांना कोणतीही सुसाईड नोट सापडलेली नाही. प्राथमिक अंदाजानुसार, हे आत्महत्या असल्याचे म्हटले जात आहे.

या महिलेला अखेरचे २३ एप्रिल रोजी किराणा मालाच्या दुकानात पाहिले होते. पोलिसांनी मृत्यूची नोंद करत मृतदेह शवविच्छेदनासाठी पाठवला आहे. पोलिसांच्या म्हणण्यानुसार, शवविच्छेदन अहवाल आल्यानंतर ही हत्या आहे की आत्महत्या, हे स्पष्ट होईल.