नागपूर : नागपूरमध्ये एक हृदयद्रावक घटना घडली आहे. गणपती विसर्जनासाठी तयार करण्यात आलेल्या टाक्यांमध्ये पोहायला जाणं एका ७ वर्षीय चिमुकल्याच्या जीवावर बेतलं आहे. महेश कोमल थापा असं या ७ वर्षीय मृतक चिमुकल्याचं नाव आहे.

नागपूरच्या लकडगंज परिसरामधील कच्ची विसा ग्राउंड या भागात गणपती विसर्जनासाठी मोठ्या टाक्या तयार करण्यात आल्या आहेत. या टाकींमध्ये पोहोण्यासाठी गेलेल्या दोघांपैकी एकाचा बुडून मृत्यू झाला आहे. या दोघांपैकी एक मुलगा बाहेर निघाला. मात्र, महेश हा पोहताना त्याचा पाय फसल्याने तो तिथेच बुडाला असल्याचा अंदाज वर्तवला जात आहे. महेशचा मृतदेह बाहेर काढण्यात आला असून पुढील तपास सुरू आहे.

गटारीचं काम करताना श्वास गुदमरून कर्मचाऱ्याचा मृत्यू

दरम्यान, अशीच काहीशी घटना संगमनेर शहरामध्ये घडली आहे. भूमिगत गटारीच्या कामादरम्यान एका कर्मचाऱ्याचा मृत्यू झाला असल्याची घटना उघडकीस आली आहे. श्वास गुदमरून या कर्मचाऱ्याचा मृत्यू झाला असून अजून दोघांची प्रकृती चिंताजनक आहे. वाचवण्यासाठी गेलेले काही पालिका कर्मचारी आणि नागरिक देखील बेशुद्ध पडले असल्याचा प्रकार समोर आला आहे. सांडपाणी प्रकल्पाच्या भूमिगत गटारीचं काम सुरु असताना ही दुर्घटना घडली आहे. नगरपालिका ठेकेदाराकडे काम करणाऱ्या दोन कर्मचाऱ्यांपैकी एकाचा मृत्यू झाला आहे तर दोन कर्मचारी अत्यवस्थ आहेत. अतुल रतन पवार असं मयत कर्मचाऱ्याचे नाव आहे. दुर्घटनेमुळे संगमनेर शहरात खळबळ उडाली आहे.