नागपूरमधील एका खासगी कंपनीत वरिष्ठ पदावर कार्यरत असलेल्या 39 वर्षीय इंजिनिअरने गुरुकुंज मोझरीमध्ये आंब्याच्या झाडाला गळफास घेऊन आत्महत्या केल्याची धक्कादायक घटना रविवारी सकाळी उघडकीस आली. या घटनेमुळे परिसरात खळबळ उडाली असून आत्महत्येमागील नेमकं कारण अद्याप स्पष्ट झालेलं नाही.

मृताची ओळख राम विनोद चौधरी अशी आहे. ते नागपूरमध्ये कोराडी थर्मल पॉवर प्लांटमध्ये वरिष्ठ पदावर कार्यरत होते. पोलिसांनी दिलेल्या माहितीनुसार, चौधरी हे रविवारी सकाळी स्वतःच्या हुंडई कारने नागपूरहून अमरावतीच्या दिशेने आले. गुरुकुंज मोझरी बायपासलगत राष्ट्रसंत पेट्रोलियमजवळ कार उभी करून त्यांनी जवळील शेतातील आंब्याच्या झाडाला दोरीच्या साहाय्याने गळफास घेतला.

सकाळी सुमारे आठच्या सुमारास ही घटना निदर्शनास आल्यानंतर तिवसा पोलिसांनी घटनास्थळी धाव घेत पंचनामा केला. मृतदेह पोस्टमार्टमसाठी पाठवण्यात आला असून या प्रकरणी अकस्मात मृत्यूची नोंद करण्यात आलीये.

प्राथमिक माहितीनुसार, आत्महत्येपूर्वी चौधरी यांनी पत्नीसह काही नातेवाईकांना गुरुकुंज मोझरी परिसरातील त्यांचं लोकेशन पाठवलं होतं. या माहितीच्या आधारे पोलिसांनी त्यांचा मोबाईल जप्त केला असून त्यातील माहितीची तपासणी सुरू आहे. त्यांनी एवढ्या अंतरावर येऊन टोकाचं पाऊल का उचललंय, याचा शोध पोलीस घेत आहेत.

पोलिसांकडून विविध अंगांनी तपास सुरू असून कुटुंबीय, नातेवाईक तसंच संबंधित व्यक्तींची चौकशी केली जात आहे. तपास पूर्ण झाल्यानंतरच आत्महत्येमागील कारण स्पष्ट होणार असल्याचं पोलिसांनी सांगितलं.