रागात माणसाच्या हातून काय घडेल आणि काय नाही याचा काही नेम नसतो. कुर्ल्यामध्ये रागाच्या भरात अशीच एक दुर्दैवी आणि हृदय पिळवटून टाकणारी घटना घडली आहे. प्रेयसीच्या मुलाने पँटवर लघवी केल्याने त्याला बेदम मारहाण केली आहे. ४ वर्षीय चिमुकल्याचा या मारहाणीत मृत्यू झाला आहे. या घटनेमुळे मुलाच्या आईवर दु:खाचा डोंगर कोसळला आहे.

मिळालेल्या अधिक माहितीनुसार, मृत मुलाची तिच्या प्रियकरासोबत राहत होती. सकाळी ती कामावर गेली असता घरी प्रियकर आणि तिची लहान मुलं होती. यातील एका ४ वर्षांच्या मुलाने महिलेच्या प्रियकराच्या पँटवर लघवी केली. याचा प्रियकराला राग आला. त्याला रागावर नियंत्रण ठेवणे कठीण झाले. त्यामुळे त्याने थेट या मुलाला मारहाण करण्यास सुरूवात केली.

मिळालेल्या अधिक माहितीनुसार,रितेश अजय चंद्रवंशी (वय, १९)असे आरोपी प्रियकराचे नाव आहे. त्याने मुलाला इतकी मारहाण केली त्याचा यात मृत्यू झाला. रितेश त्याची प्रेयसी आणि तिची लहान मुलं यांच्यासह कुर्लातील पत्राचाळीत राहत होता. त्याची प्रेयसी मुळची पटना येथील आहे. तिने पतीपासून विभक्त झाल्यावर रितेशसोबत मैत्री केली. रितेश बरोबर मैत्री झाल्यावर मैत्रीचं रुपांतर प्रेमात झालं आणि ती मुलांसह त्याच्यासोबत राहण्यासाठी आली.

महिला घरी आली तेव्हा तिच्या मुलांनी घडलेली घटना तिला सांगितली. तिने आपल्या मुलाला लगेचच राजावाडीमध्ये दाखल केलं मात्र तेथून पुन्हा सायनला घेऊन जाण्याचा सल्ला दिला गेला. मुलावर उपचार सुरू असतानाच त्याचा मृत्यू झाला आहे. महिलेने या प्रकरणी प्रियकराविरोधात गुन्हा दाखल केला आहे.