Jharkhand A Man Threw ATM Machine In River:

झारखंडमध्ये एक विचित्र घटना घडली आहे. चक्रधरपूरमध्ये एटीएम मशीनची तोडफोड करण्यात आली आहे. एका माथेफिरूनं एटीएममधून पैसे मिळाले नाहीत म्हणून मशीनची तोडफोड केली आणि त्याचे पार्ट नदीत फेकून दिले. (Latest News)

झारखंडमधील चक्रधरपूर येथील रेल्वे उड्डाणपुलाजवळील टाटा इंडिकॅश एटीएममध्ये ही घटना घडली आहे. मिळालेल्या माहितीनुसार, मंगळवारी हैदर नावाचा एक तरूण एटीएममध्ये पैसे काढण्यासाठी गेला होता. त्याने एटीएम कार्ड मशीनमध्ये टाकले आणि ८०० रुपये काढण्याची प्रक्रिया पूर्ण केली. त्यानंतर अचानक एटीएमची लाइट गेली आणि मशीन बंद पडले. त्यामुळे पैसे बाहेर आले नाही. मात्र, हैदरला पैसे क्रेडिट झाल्याचा मेसेज आला. हैदरच्या बँक खात्यातून पैसे वळते झाले. एटीएममधून प्रत्यक्षात त्याच्या हाती पैसे आले नाहीत. त्यामुळे हैदरला खूप राग आला. रागाच्या भरात त्याने एटीएम मशीन फोडले. त्यानंतर एटीएम मशीनचे वेगवेगळे भाग नदीत फेकून दिले.

मंगळवारी भरदिवसा ही घटना घडली आहे. हा संपूर्ण प्रकार होत असताना आजूबाजूच्या लोकांनी त्याला थांबवण्याचा प्रयत्न देखील केला नाही. या घटनेची माहिती मिळताच पोलिसांनी घटनास्थळी धाव घेतली. त्यानंतर पोलिसांनी हैदरला अटक केली असून, संपूर्ण प्रकरणाची माहिती घेत आहेत. हैदरच्या सांगण्यावरुन एटीएम मशीनचे वेगवेगळे पार्ट, डिस्प्ले बोर्ड, एटीएम कार्ड रीडर आणि हार्ड डिस्क नदीतून बाहेर काढण्यात आले आहेत.

मिळालेल्या माहितीनुसार, हैदरचे मानसिक आरोग्य ठीक नव्हते. त्यामुळेच त्याने हे कृत्य केले आहे. याआधीही त्याने एकदा एटीएम मशीन फोडून त्यातून पैसे काढण्याचा प्रयत्न केला आहे.