रामू ढाकणे, साम प्रतिनिधी

जालना : एक युवक आणि युवती छत्रपती संभाजीनगरवरुन दुचाकीने एका गावाच्या पाटीजवळ आले. त्या गावाच्या पाटीजवळ आपली बाईक उभी केली. त्यानंतर ते दोघे शेजारच्या शेतात असलेल्या लिंबाच्या झाडाखाली गेले. त्यानंतर कोणाला काही थांगपत्ता लागण्याआधी त्यांनी आपलं जीवन संपवलं. ही भयानक घटना घडलीय जालना जिल्ह्यात.

जालनामधील शिंगाडे पोखरी शिवारात एका विवाहित प्रेमी युगुलाने लिंबाच्या झाडाला गळफास घेत आत्महत्या केल्याची धक्कादायक घटना घडलीय. या घटनेची माहिती मिळताच मौजपुरी पोलीस ठाण्याचे काही पोलीस कर्मचारी घटनास्थळी दाखल झाले.आणि पंचनामा करून दोघांचेही मृतदेह शवविच्छेदनासाठी जालन्यातील घाटी रुग्णालयामध्ये पाठवले.

पोलिसांनी दिलेल्या माहितीनुसार, कैलास गवई आणि मुक्ता खंडागळे अशी मयातांची नावे आहेत. प्रेमी युगुल छत्रपती संभाजी नगर जिल्ह्यातील रांजणगाव येथील रहिवासी होते. दरम्यान त्यांनी हे टोकाचे पाऊल का उचललं याचं कारण अजून समजू शकलेले नाही. मात्र प्रेम प्रकरणातूनच ही आत्महत्या झाली असल्याचा संशय आता पोलिसांनी व्यक्त केलाय.

दरम्यान या घटनेसंदर्भाततील अधिकची माहिती अशी की, हे दोघेही छत्रपती संभाजीनगरवरुन आपल्या दुचाकीवर आले होते, त्यानंतर जालना तालुक्यातील शिंगाडे पोखरी पाटीजवळ आपली दुचाकी लावली. शेजारच्या शेतात असलेल्या लिंबाच्या झाडाला गळफास घेत या दोघांनीही आपली जीवन यात्रा संपवली.