गोपाळ मोटघरे, पिंपरी-चिंचवड

पिंपरी-चिंचवडमध्ये दोन जणांची निर्घण हत्या करण्यात आल्याची घटना समोर आली आहे. डोक्यामध्ये दगड घालून एका महिला आणि पुरूषाची निर्घृण हत्या करण्यात आली. पिंपरी-चिंचवड शहरातील तळवडे परिसरात या दुहेरी हत्याकांडाची घटना घडली. विवाहबाह्य संबंधातून हत्या केल्याची प्राथमिक माहिती समोर आली आहे. या घटनेमुळे पिंपरी-चिंचवडमध्ये खळबळ उडाली आहे.

मिळालेल्या माहितीनुसार, पिंपरी-चिंचवडच्या तळवडे येथील डाऊन टाऊन हॉटेलच्या मागे दोघांची हत्या करण्यात आली. जगन्नाथ पुंडलिक सरोदे (वय ५६ वर्षे) आणि मंगला सुरज टेंभरे (वय ३० वर्षे) या दोघांची दगडाने ठेचून हत्या करण्यात आली. मध्यरात्री एक ते दोन वाजताच्या दरम्यान ही घटना घडली. घटनेची माहिती मिळताच देहू रोड पोलिसांनी घटनास्थळी धाव घेतली. या प्रकरणाचा पोलिसांकडून तपास सुरू आहे.

पोलिसांनी दिलेल्या माहितीनुसार, पिंपरी-चिंचवडमधील तळवडे येथील डाऊन टाऊन हॉटेलच्या मागे बांधकाम सुरू असलेल्या कंपनीजवळ या दोघांची हत्या करण्यात आली. जगन्नाथ सरोदे हे मजुरी करत होते. ते तळवडेत राहत होते. पण मुळचे अकोल्याचे होते. तर मंगला टेंभरे ही महिला तळवडेमध्येच राहत असून ती मूळची अमरावतीची होती.

या महिला आणि पुरुष दोघांची दगडाने ठेचून हत्या करण्यात आली. दोघांच्याही तोंड, हात, पाय आणि शरीराच्या अनेक ठिकाणी जखमा आढळून आल्या. अनैतिक संबंधातून दोघांची हत्या झाल्याचा अंदाज पोलिसांनी वर्तवला आहे. पोलिसांनी दोघांचे मृतदेह ताब्यात घेऊन शवविच्छेदनासाठी रुग्णालयात पाठवले आहेत. सध्या देहू पोलिस अधिक तपास करत आहेत.