छत्रपती संभाजीनगर : छत्रपती संभाजीनगरच्या वैजापूरमध्ये चिंचडगाव शिवारात महिला कीर्तनकाराच्या डोक्यात दगड घालून हत्या करण्यात आल्याचा प्रकार घडला. शनिवारी सकाळी १०.३०च्या सुमारास ह.भ.प संगीताताई अण्णासाहेब पवार (वय ५०) असं मृत कीर्तनकार महिलेचं नाव आहे. आश्रमात घुसून मारेकर्‍यांनी कीर्तनकार महिलेला डोक्यात दगड घालून संपवलं. दरम्यान, या प्रकरणात आता नवी अपडेट समोर आली आहे. ह.भ.प संगीता महाराज यांना एप्रिल महिन्यात जीवे मारण्याची धमकी देण्यात आली होती. वैजापूर पोलीस ठाण्यात तशी तक्रारही देण्यात आली होती. जागेच्या वादातून शेजाऱ्यांशी भांडण असल्याचं त्यांनी सांगितलं होतं. 'मी एकटी राहते, मला मारून टाकतील', अशी धमकी दिल्याचं संगीता महाराज यांनी सांगितलं होतं.

शनिवारी सकाळी आश्रमातील मंदिरात पुजारी शिवाजी चौधरी नेहमीप्रमाणे पूजेसाठी आले होते. त्यावेळी ह.भ.प संगीताताई पवार यांना आवाज दिल्यानंतर त्यांनी प्रतिसाद न दिल्यामुळे मंदिराशेजारी असणाऱ्या शेडमध्ये जाऊन बघितलं असता संगीताताई रक्ताच्या थारोळ्यात पडलेल्या होत्या. संगीता ताई पवार झोपलेल्या असताना डोक्यात दगड घालून त्यांची हत्या केल्याचं प्राथमिक तपासात समोर आलं आहे. त्यांचा मृतदेह शवविच्छेदनासाठी पाठवण्यात आला असून शवविच्छेदन आणि फॉरेन्सिकची टीम घटनास्थळी दाखल झाली आहे.

दरम्यान, श्वानपथक घटनास्थळी पोहोचले आहे. ह.भ.प. संगीताताई महाराज यांची हत्या का केली? कुणी केली? याबाबत अद्याप कोणतीही माहिती समोर आलेली नाही. पोलिसांकडून आश्रमात चौकशी करण्यात येत आहे. श्वानपथकाकडून पुरावे शोधण्याचं काम करण्यात येत आहे. पोलिसांनी घटनास्थळाचा पंचनामा केला असून मृतदेह पोस्टमार्टेमसाठी पाठवण्यात आला आहे. अज्ञाताचा शोध पोलिसांकडून घेण्यात येत आहे. या धक्कादायक घटनेनंतर छत्रपती संभाजीनगरमध्ये हळहळ व्यक्त करण्यात येत आहे.