सध्या सोशल मीडियावर एक व्हिडिओ तुफान व्हायरल होत आहे. व्हिडिओमध्ये नोटांचे बंडल दिसत असून नोटांवर महात्मा गांधीजींच्या फोटो ऐवजी बॉलिवूडचे ज्येष्ठ अभिनेते अनुपम खेर (Anupam Kher) यांचा फोटो पाहायला मिळत आहे. अहमदाबाद पोलिसांनी सुमारे 1 कोटी 60 लाख रुपयांच्या अशा नोटा जप्त केल्या आहेत. या नोटांचा आकार, रंग मूळ नोटांसारखाच आहे. पण या खोट्या नोटा असल्याचे स्पष्ट झाले आहे.

अनुपम खेर यांनी सुद्धा हा व्हिडिओ सोशल मीडियावर शेअर केला आहे. "पाचशे रुपयांच्या नोटेवर गांधीजींच्या फोटोऐवजी माझा फोटो???? काहीही होऊ शकते!" असे कॅप्शन देऊन त्यांनी हा व्हिडिओ शेअर केला आहे.

सोशल मीडियावर व्हायरल होणाऱ्या या व्हिडीओमध्ये पहिल्या नजरेत कोणालाही ही नोट खरी वाटेल. मात्र तसे नाही आहे. नोटेचे डिझाईन हुबेहुब पाचशे रुपयांच्या नोटेसारखे आहे. मात्र नोटांवरील फोटो वेगळा आहे. यावरून नोट खरी नसल्याचे स्पष्ट होते. याशिवाय नोटेवर रिझर्व्ह बँक ऑफ इंडिया (RBI) ऐवजी 'Resol Bank of India' असे लिहिले आहे.

तुम्ही व्हिडिओमध्ये पाहू शकता की, नोटा एकत्र ठेवण्यासाठी कागदाचा तुकडा वापरण्यात आला आहे. नुकताच 22 सप्टेंबर रोजी गुजरातच्या सुरत पोलिसांनी बनावट नोटा बनवणाऱ्या टोळीचा पर्दाफाश केला होता. याप्रकरणी पोलिसांनी चार आरोपींना अटक केली होती. अटक करण्यात आलेल्या आरोपींकडून 1 लाख 20 हजार रुपयांच्या बनावट नोटा जप्त करण्यात आल्या होत्या.