Crime : उपचार करण्याच्या बहाण्याने २५ वर्षीय गर्भवती महिलेवर बलात्कार झाल्याची धक्कादायक घटना समोर आली आहे. महिलेला त्रास होत असल्याने तिला सासऱ्याने एका मांत्रिकाकडे उपचार करण्यासाठी नेले होते. मांत्रिकाने महिलेले खोलीत नेत तिच्यावर बलात्कार केला. मांत्रिक त्याच्या साथीदारांसह महिलेवर वारंवार बलात्कार करत होता. सदर घटना बिहारमधील मुझफ्फरपूरमध्ये घडली आहे.

मिळालेल्या माहितीनुसार, चार महिने गर्भवती असलेल्या महिलेची प्रकृती बिघडली होती. तब्येत बरी करण्यासाठी महिलेच्या सासऱ्याने तिला एका तांत्रिकाकडे नेले. मांत्रिकाने सासरच्यांना बाहेर बसवले आणि उपचार करण्याच्या बहाण्याने महिलेला खोलीत नेले. तेथे त्याने महिलेवर अत्याचार केले. महिलेने घाबरुन कुणाला काही सांगितले नाही.

मांत्रिकाने महिलेला बोलावून तिच्यावर पुन्हा बलात्कार केला. त्यानंतर काही दिवसांनी मांत्रिकाने त्याच्या दोन साथीदारांसह महिलेवर सामूहिक बलात्कार केला. यानंतर महिलेची प्रकृती बिघडली. महिलेला स्थानिक रुग्णलयामध्ये दाखल करण्यात आले. तेव्हा पीडित महिलेने घडलेला प्रकार कुटुंबीयांना सांगितला. या प्रकरणाची माहिती समोर आल्यानंतर परिसरात खळबळ उडाली.

ही घटना शिवाईपट्टी पोलीस स्टेशन परिसरातील मधेरा गावात घडली आहे. पोलिसांनी पीडित महिलेचा जबाब नोंदवला आहे. उपचार करण्याच्या बहाण्याने चार महिन्यांची गरोदर असलेल्या महिलेवर सामूहिक बलात्कार केल्याप्रकरणी पोलीस ठाण्यात गुन्हा दाखल करण्यात आला आहे. या प्रकरणाची चौकशी जलदगतीने होणार असल्याचे पोलिसांनी म्हटले आहे.