बीडमधील मस्साजोग येथील आवादा एनर्जी प्रकल्प परिसरात चोरी करणाऱ्या टोळीवर पोलिसांनी बेधडक कारवाई केली आहे. मकोका अंतर्गत कारवाईचा प्रस्ताव पोलीस अधीक्षकांनी दिला आहे. एप्रिल महिन्यात आवादा एनर्जी प्रकल्प परिसरात एका टोळीकडून कॉपर चोरीचा प्रकार घडला होता. चोरीसह या टोळीने तेथील वॉचमनला मारहाण करून डांबून ठेवले होते.

या घटनेत पोलिसांनी तपास करून 10 आरोपींपैकी चार आरोपींना अटक केली. ही टोळी असून त्यांच्यावर विविध ठिकाणी 27 गुन्हे दाखल आहेत. याच अनुषंगाने या टोळीवर मकोका अंतर्गत कारवाई केली जाणार आहे. तर वादग्रस्त निलंबित पोलीस अधिकारी रणजीत कासले यांनी केलेल्या आरोप प्रकरणात चौकशी सुरू असून या चौकशीनंतर त्यांच्यावर कारवाई केली जाणार आहे. तर आज शिवाजीनगर पोलीस ठाण्यात ॲट्रॉसिटी अंतर्गत कासले यांच्या विरोधात गुन्हा दाखल करण्यात आल्याचं पोलीस अधीक्षक नवनीत कॉवत यांनी सांगितले आहे.