सरपंच अपहण आणि हत्या प्रकरणाने बीड जिल्ह्यातील गुंडगिरीची चर्चा राज्यभरात होत आहे. संतोष देशमुख हत्या प्रकरण ताजे असतानाचा बीडच्या अंबाजोगाईत एक तरुणाचा मृतदेह आढळून आलाय. शहरातील मुकुंदराज रोडवरील एका शेतात तरुणाचा मृतदेह आढळलाय. यामुळे खळबळ उडालीय. मृतदेह आढळल्यानंतर पोलिसांनी पंचनामा करत तपास सुरू केलाय.

मृतदेह आढळून आलेल्या तरुणाचं वय २५ वर्ष असल्याचं सांगितलं जात आहे. अंबाजोगाईतील मुकुंदराज रोडवरील गवळी यांच्या शेतात मृतदेह आढळलाय. मयत तरुणाच्या चेहऱ्यावर जखमा असल्याचं समोर आले आहे. शौकत अली मेहराज अली सय्यद वय २५ रा. बीड असं मयत तरुणाचे नाव आहे. तर घटनेची माहिती पोलिसांना मिळाल्यानंतर पोलिसांनी घटनास्थळी दाखल होत पंचनामा केलाय. त्यानंतर सदरील मृतदेह शवविच्छेदनासाठी अंबाजोगाईच्या शासकीय रुग्णालयात पाठवण्यात आलाय. दरम्यान हा घात आहे की अपघात ? याचा तपास आता अंबाजोगाई पोलीस करत आहेत.

बीडमधील मस्साजोग येथील माजी सरपंच संतोष देशमुख यांच्या हत्या प्रकरणानं संपूर्ण राज्य हादरलं. यानंतर बीडमधील गुन्ह्यांचा आढावा घेण्यात आला. याच पार्श्वभूमीवर मागील ११ महिन्यांचा गुन्ह्याचा आढावा घेण्यात आलाय. गुन्हेगारांची आकडेवारी पाहता २०२३ पेक्षा २०२४ साली गुन्हेगारीच्या प्रमाणात वाढ झाली आहे. प्रत्येक आठवड्याला एकाची हत्या होत असून, २ दिवसाला एकावर जीवघेणा हल्ला, हत्येचा प्रयत्न करण्याची नोंद करण्यात आलीय.

२०२३ च्या तुलनेत २०२४ मध्ये १ हजार १४७ गुन्ह्यांच्या संख्येत वाढ झालीय. या सर्व परिस्थितीवरून जिल्ह्यातील कायदा व सुव्यवस्थेचा प्रश्न ऐरणीवर आलाय. २०२४ या वर्षात ४० हत्या झाल्याची नोंद बीडमध्ये झालीय. डिसेंबर अखेरीस मस्साजोगचे सरपंच संतोष देशमुख यांची ज्या प्रकारे हत्या झाली, त्याने तर बीडच नव्हे तर महाराष्ट्र हादरलाय. मात्र त्यानंतर सुद्धा बीड जिल्ह्यातील गु्न्हेगारी कमी झाल्याचं चित्र तरुणाचा मृतदेह आढळल्यानंतर दिसून येत आहे.