तुम्ही बचतीची रक्कम फिक्स्ड डिपॉझिट (FD) मध्ये गुंतवण्याचा विचार करत असाल, तर ही बातमी तुमच्यासाठी महत्त्वाची आहे. भारतीय रिझर्व्ह बँक (RBI) ने बँक ठेवींवरील व्याजाच्या दराशी संबंधित नियमांमध्ये बदल केले असून, हे नवे नियम १ ऑक्टोबर २०२६ पासून लागू होणार आहेत. या बदलांचा मुख्य उद्देश FD वरच्या व्याजजरांमध्ये जास्त पारदर्शकता आणणं आणि ग्राहकांना समान संधी मिळवून देणं हा आहे.

समान अटींवर वेगळा व्याजदर देता येणार नाही

नव्या नियमांनुसार, एकाच बँकेच्या वेगवेगळ्या शाखांमध्ये ग्राहकांना समान अटींवर वेगवेगळे FD व्याजदर देण्याची शक्यता कमी होणार आहे. उदाहरणार्थ, दोन ग्राहकांनी समान दिवशी, समान रक्कम, समान कालावधी आणि समान अटींवर FD केली, तर फक्त शाखा किंवा शहर वेगळं असल्यामुळे त्यांना वेगवेगळं व्याजदर देता येणार नाहीत. यामुळे FD करणाऱ्या सामान्य ग्राहकांना अधिक समान आणि पारदर्शक व्याजदर मिळायला मदत होऊ शकते.

बँकेच्या वेबसाइटवर व्याजदरांची माहिती

नव्या नियमांनुसार बँकांना त्यांच्या FD वर लागू असलेल्या व्याजदरांची माहिती अधिकृत वेबसाइटवर उपलब्ध करून द्यावी लागेल. त्यामुळे ग्राहकांना शाखेत जाण्याआधीच वेगवेगळ्या कालावधी आणि ठेवींच्या रकमेवरील व्याजदर पाहता येतील. यामुळे विविध बँकांच्या FD योजनांची तुलना करणंही सोपं होईल.