तुम्ही खासगी कंपनीत नोकरी करत असाल तर तुमच्यासाठी ही बातमी महत्त्वाची आहे. ऑक्टोबर २०२६ महिन्याचा पगार आणि पीएफ जमा करण्याची प्रोसेस पूर्ण करण्यासाठी कंपन्यांकडे आज शेवटची संधी आहे. कर्मचारी भविष्य निर्वाह निधी संघटनेने (EPFO) कंपन्यांना १५ नोव्हेंबरपर्यंत पीएफचे पैसे आणि इलेक्ट्रॉनिक चलान-कम-रिटर्न (ECR) जमा करायला सांगितले. मुदतीत ही प्रोसेस केली नाही तर संबंधित कंपन्यांना व्याज आणि दंड भरावा लागू शकतो. त्यामुळे कंपन्यांनी वेळेत हे काम पूर्ण करणं महत्त्वाचं आहे.

पीएफ जमा करण्याची आज शेवटची तारीख

खासगी कंपन्यांना ऑक्टोबर २०२६ च्या पगारातल्या कर्मचाऱ्यांचा आणि कंपनीचा पीएफमधला हिस्सा १५ नोव्हेंबरपर्यंत जमा करावा लागेल. यासोबतच ECR दाखल करणंही गरजेचं आहे. वेळेत पीएफ जमा केल्यावर कंपन्यांना जास्त आर्थिक भार सहन करावा लागणार नाही. तसेच कर्मचाऱ्यांच्या पीएफ खात्यातही रक्कम वेळेवर जमा होईल.

ECR म्हणजे नेमकं काय?

ECR म्हणजे इलेक्ट्रॉनिक चालान-कम-रिटर्न. ही कंपन्यांकडून दर महिन्याला EPFO कडे सादर केली जाणारी माहिती आहे. यामध्ये कर्मचाऱ्यांचे नाव, पगार, पीएफमधले योगदान आणि जमा होणाऱ्या रकमेचा तपशील दिलेला असतो. ECR भरताना सर्व माहिती अचूक असणं महत्त्वाचं आहे.

फक्त ECR भरून चालणार नाही

कंपन्यांनी एक गोष्ट लक्षात ठेवणं गरजेचं आहे. फक्त ECR दाखल करून पीएफची प्रोसेस पूर्ण होत नाही. ECR दाखल केल्यानंतर संबंधित पीएफची रक्कमही EPFO कडे जमा करावी लागते. या दोन्ही प्रोसेस पूर्ण झाल्यानंतरच कर्मचाऱ्यांच्या खात्यात पीएफचे योगदान जमा होऊ शकते.