डिसेंबर महिन्याची सुरूवात होईल. दरम्यान, वर्षाच्या शेवटच्या महिन्याची सुरूवात होण्याआधीच सामान्य नागरिकांसाठी काही महत्वाचे बदल लागू होणार आहेत. कर, पेन्शन, एलपीजीचे दर, विमान प्रवासाचे संभाव्य वाढलेले खर्च. या सर्व गोष्टींवर १ डिसेंबरपासून प्रभाव पडणार असल्याची माहिती आहे. जर तुम्ही नोव्हेंबरच्या अखेरपर्यंत आवश्यक कागदपत्रे सादर केली नाहीत, तर पेन्शन रोखले जाणे, कर विभागाकडून नोटीस, प्रवास खर्च वाढणे, अशी अडचण निर्माण होऊ शकते. त्यामुळे वेळीच बदल जाणून घ्या.

यूपीएसमध्ये जॉईन होण्याची शेवटची संधी

केंद्र सरकारच्या कर्मचाऱ्यांना युनिफाइड पेन्शन स्कीममध्ये सामील होण्यासाठी ३० नोव्हेंबर ही शेवटची तारीख असणार आहे. एनपीएवरून युपीएसमध्ये बदल करू इच्छिणाऱ्या कर्मचाऱ्यांनी या तारखेपर्यंत सीआरए पोर्टलवर अर्ज करणे बंधनकारक आहे. अर्ज भरण्याची अंतिम मुदत चुकल्यास पुढील तारीख समोर येईपर्यंत प्रतिक्षा करावी लागेल.

कर भरण्यात विलंब झाला तर भरावा लागेल दंड

नोव्हेंबरचा शेवटचा आठवडा करदात्यांसाठी महत्वाचा असतो. टीडीएस स्टेंटमेंट दाखल करण्याची (कलम १९४-आयए, १९४-आयबी, १९४एम, १९४एस) दाखल करण्याची अंतिम तारीख ३० नोव्हेंबर आहे. कलम ९२ई अंतर्गत ट्रान्सफर प्राइसिंग रिपोर्ट सादर करणे आवश्यक असलेल्यांनीही या तारखेपर्यंत रिटर्न दाखल करावेत. तसेच भारतामध्ये काम करणाऱ्या परदेशी कंपन्यांनी फॉर्म ३ सीईएए सादर करणे बंधनकारक आहे. दरम्यान, अंतिम तारखेपलीकडे विलंब झाल्यास दंड आणि आयकर विभागाकडून नोटीस मिळण्याची शक्यता आहे.

विमान प्रवास महागण्याची शक्यता

१ डिसेंबर रोजी विमान इंधनाच्या किमतींचा आढावा घेतला जाईल. जर दर वाढले तर, डिसेंबर महिन्यात विमान तिकिटे महागण्याची शक्यता आहे. याचा थेट परिणाम देशांतर्गत आणि आंतरराष्ट्रीय प्रवाशांवर होईल.

पेन्शनधारकांना बसू शकतो फटका

३० नोव्हेंबरपर्यंत जीवन प्रमाणपत्र सादर न केल्यास, डिसेंबर महिन्यापासून पेन्शन क्रेडिट थांबवले जाऊ शकते. पेन्शनधारक हे प्रमाणपत्र बँक, पोस्ट ऑफिस किंवा अॅपद्वारे सहजरित्या सादर करू शकतात.

एलपीजी सिलिंडरच्या किमतीत बदल

दर महिन्याप्रमाणे, १ डिसेंबर रोजी एलपीजी सिलिंडरच्या किमतीत बदल होण्याची शक्यता आहे. घरगुती एलपीजीच्या किमतीत वाढ झाल्यास याचा थेट फटका घरगुती बजेटवर होतो. माहितीनुसार, कमर्शियल सिलिंडर आधीच स्वस्त झाले आहेत. यामुळे घरगुती ग्राहक आता नवीन दरांकडे उत्सुकतेने पाहत आहेत.