लाडक्या बहि‍णींसाठी अत्यंत महत्त्वाची बातमी समोर आली. मुख्यमंत्री माझी लाडकी बहीण योजनेतील पात्र महिलांसाठी राज्य सरकारकडून महत्त्वाचा निर्णय घेण्यात आला आहे. २०२६ ते २७ या आर्थिक वर्षासाठी योजनेच्या अनुसूचित जाती आणि नवबौद्ध प्रवर्गातील लाभार्थी महिलांसाठी मोठी आर्थिक तरतूद करण्यात आली आहे. या योजनेसाठी एकूण ३००० कोटी रुपयांचा निधी मंजूर करण्यात आला आहे.

वित्त विभागाच्या संबंधित शासन निर्णयानुसार, जुलै २०२६ महिन्याच्या आर्थिक लाभासाठी ३४४.७४ कोटी रुपयांचा निधी मंजूर करण्यात आला आहे. हा निधी अनुसूचित जाती आणि नवबौद्ध प्रलर्गातल्या पात्र महिलांच्या खात्यावर योजनेचा लाभ देण्यासाठी वापरण्यात येणार आहे.

सरकारने निधीच्या वापराबद्दल स्पष्ट निर्देशही दिले आहेत. संबंधित निधी फक्त अनुसूचित जाती आणि नवबौद्ध प्रवर्गातील पात्र महिला लाभार्थ्यांसाठीच खर्च करावा, असं सांगण्यात आलं आहे. त्यामुळे या प्रवर्गातील महिलांना योजनेचा लाभ मिळवण्यासाठी पात्रतेची छाननी महत्त्वाची ठरणार आहे.

लाभ देण्याआधी पात्र लाभार्थी महिलांची योग्य पद्धतीने तपासणी आणि छाननी करण्याचे निर्देश संबंधित विभागाला देण्यात आले आहेत. उपलब्ध निधीचा वापर मंजूर तरतुदीनुसारच करण्यात यावा आणि निधीचा अनावश्यक किंवा इतर कारणांसाठी वापर होणार नाही याची दक्षता घ्यावी असंही सांगण्यात आलं आहे.

तसेच लाभार्थी महिलांची संख्या उपलब्ध करून देणं, पात्र महिलांना वेळेत लाभ मिळेल याची खात्री करणे आणि निधीच्या वितरणाची प्रोसेस नियमानुसार राबवणे ही जबाबदारी महिला व बाल विकास विभागाची राहणार आहे.

दरम्यान, या निर्णयामुळे लाडकी बहीण योजनेच्या अनुसूचित जाती व नवबौद्ध प्रवर्गातील पात्र महिलांना जुलै महिन्याचा लाभ मिळण्याचा मार्ग मोकळा झाला आहे. पात्र महिलांनी आपली कागदपत्रे आणि लाभार्थी म्हणून नोंदणीची माहिती अपडेट आहे की नाही, याची खात्री करून घेणं महत्त्वाचं ठरणार आहे.