फेब्रुवारी महिन्याचे पैसे कधी मिळणार याची लाडक्या बहिणींना प्रतिक्षा होती. फेबुवारी आणि मार्च अशा दोन महिन्यांचे पैसे एकत्र दिले जाणार का? असा सवालही केला जात होता. मात्र आता महिला दिनाच्या पूर्वसंध्येलाच लाडकींना फक्त फेब्रुवारीच नव्हे तर मार्च महिन्याचं मानधनही एकत्रित मिळणार आहे.

बालविकास विभागाच्या मंत्री आदिती तटकरे यांनी द्विट करत ही माहिती दिली आहे. महिला दिनाच्या पूर्वसंध्येलाच म्हणजे सात तारखेलाच सर्व पात्र लाडक्या बहिणींच्या खात्यात ३००० रूपये जमा होणार आहेत.

काय आहे ट्विट?

लाडक्या बहिणींना महिला दिनाची भेट ! महिला दिनाच्या पूर्वसंध्येलाच मुख्यमंत्री माझी लाडकी बहीण योजनेतील सर्व पात्र लाभार्थ्यांना फेब्रुवारी आणि मार्च महिन्याचा लाभ दिला जाणार आहे. ७ मार्च २०२५ पर्यंत सर्व पात्र लाभार्थ्यांच्या बॅंक खात्यात दोन महिन्यंाचा सन्मान निधी ३००० रूपये जमा करण्यात येईल.

लाडकीला महिला दिनाचं डबल गिफ्ट

दोन महिन्यांचा निधी एकत्र देऊन लाडक्या बहिणींना खूश करण्यात येत आहे तर दुसरीकडे पात्रतेचे निकषही कडक करण्यात येत आहेत.

गेल्या दोन महिन्यांत 9 लाख लाभार्थीची संख्या कमी झाली आहे. छाननीत जानेवारी महिन्यात 5 लाख, तर फेब्रुवारीत 4 लाख महिला अपात्र ठरल्या आहेत. योजनेचे निकष लावल्यानंतर टप्याटप्प्याने 50 लाख महिला अपात्र होण्याची शक्यता वर्तवली जात आहे. त्यामुळे सरकारच्या तिजोरीवरील खर्च दरमहा 135 कोटी आणि वर्षाला 1620 कोटी रुपयांनी वाचणार आहे.

कठोर पडताळणीमुळे लाडकी बहीण योजनेतील लाभार्थ्यांची संख्या प्रत्येक महिन्यात घटत चालली असल्यानं लाडक्या बहिणींचं टेन्शनही वाढलंय. तर महिला दिनाचं हे गिफ्ट मिळालं असतानाही लाडक्या बहिणींची 1500 चा हफ्ता 2100 रुपये कधी होणार याचीही उत्सुकता कायम आहे.