सणासुदीच्या दिवसांमध्ये सोनं- चांदी करण्याचा विचार करणाऱ्यांसाठी महत्त्वाची बातमी आहे. गेल्या चार व्यावसायिक दिवसांमध्ये सोनं आणि चांदीच्या दरात मोठी घसरण झाली आहे. दिलेल्या माहितीनुसार, सोनं ४,७९६ रुपयांनी, तर चांदी तब्बल १६,५०३ रुपयांनी स्वस्त झालं आहे.त्यामुळे ग्राहकांना काहीसा दिलासा मिळाला आहे.

चांदीचे दर घसरले

इंडिया बुलियन अँड ज्वेलर्स असोसिएशनच्या (IBJA) आकडेवारीनुसार, चांदीचा दर प्रति किलो ५,३६२ रुपयांनी घसरून १.९४ लाख रुपयांवर आला. गुरुवारी चांदीचा दर २ लाख रुपयांच्या आसपास होता. जवळपास दहा महिन्यांनंतर चांदी परत दोन लाख रुपयांच्या खाली आल्याची माहिती मिळाली. १६ ऑक्टोबर रोजी चांदीचा दर २.१० लाख रुपये प्रति किलो होता. त्यानंतर झालेल्या घसरणीमुळे चांदी खरेदी करणाऱ्यांना दिलासा मिळाला आहे.

सोन्याचे दरही घसरले

१० ग्रॅम २४ कॅरेट सोन्याचा दर १,०६४ रुपयांनी कमी होऊन १.४१ लाख रुपयांवर आला. २२ ऑक्टोबर रोजी सोन्याचा दर १.४३ लाख रुपये होता. गेल्या चार व्यावसायिक दिवसांमधल्या घसरणीमुळे सोन्याच्या किमतीतही मोठा फरक पडला आहे.

सोनं-चांदीच्या दरात चढ- उतार का होतात?

वेगवेगळ्या शहरांमध्ये सोनं-चांदीचे दर बदलण्यामागे वाहतूक आणि सुरक्षेचा खर्च, स्थानिक मागणी-पुरवठा, ज्वेलर्स असोसिएशनचे दर आणि व्यापाऱ्यांकडच्या जुन्या साठ्याची खरेदी किंमत अशी विविध कारणे आहेत. त्यामुळे एकाच दिवशी वेगवेगळ्या शहरांमधल्या दरांमध्ये फरक दिसू शकतो.

विक्रमी दरापासून चांदी मोठ्या प्रमाणात स्वस्त

दिलेल्या माहितीनुसार, २९ जानेवारी रोजी चांदीचा दर ३.८६ लाख रुपये प्रति किलो या विक्रमी पातळीवर पोहोचला होता. त्यानंतर चांदीच्या दरात मोठी घसरण झाली. त्याच दिवशी सोन्यानेही १.७६ लाख रुपये प्रति १० ग्रॅम अशी उच्च पातळी गाठली होती.