मध्य प्रदेशातील लाडक्या बहिणींसाठी आनंदाची बातमी आहे. मुख्यमंत्री डॉ. मोहन यादव यांनी शुक्रवारी मुख्यमंत्री लाडली बहना योजनेचा ४२वा हप्ता महिलांच्या खात्यात वितरित केला आहे . या माध्यमातून राज्यातील १ कोटी २४ लाखांहून अधिक पात्र महिलांच्या बँक खात्यांमध्ये १८३१ कोटी रुपयांपेक्षा जास्त रक्कम जमा करण्यात आली. यामुळे प्रत्येक पात्र महिलेच्या खात्यात आता १ हजार ५०० रुपये जमा होणार आहेत.

शिवपुरी जिल्ह्यातील पिछोर येथे आयोजित महिला संमेलनात मुख्यमंत्र्यांच्या हस्ते हा निधी वितरित करण्यात आला. यावेळी बोलताना त्यांनी महिलांना आर्थिकदृष्ट्या सक्षम आणि स्वावलंबी बनवणे हे सरकारचे प्रमुख उद्दिष्ट असल्याचे सांगितले. महिलांना आर्थिक आधार मिळाल्यास राज्याच्या विकासालाही गती मिळेल, असे त्यांनी नमूद केले. या कार्यक्रमात मुख्यमंत्र्यांनी अभियानांतर्गत कार्यरत असलेल्या ५.५ लाखांहून अधिक महिला बचत गटांनाही मोठी मदत दिली. या गटांना कॅश क्रेडिट सुविधेअंतर्गत २०० कोटी रुपयांपेक्षा अधिक निधी देण्यात आला.

याशिवाय शिवपुरी जिल्ह्यातील २२१.२२ कोटी रुपयांच्या १२१ विकासकामांचे उद्घाटन आणि भूमिपूजन करण्यात आले. यामध्ये पूर्ण झालेल्या ३६ कामांचे उद्घाटन, तर ८५ नवीन कामांचे भूमिपूजन करण्यात आले. दरम्यान, पिछोरला स्वतंत्र जिल्ह्याचा दर्जा देण्याच्या मागणीवरही मुख्यमंत्र्यांनी भाष्य केले. यासाठी सरकारने परिसीमन आयोग स्थापन केला असून, आयोगाच्या शिफारशीनुसार पुढील निर्णय घेतला जाईल, असे त्यांनी स्पष्ट केले.

पिछोर येथे शाळा आणि आधुनिक क्रीडा संकुल उभारण्याची घोषणाही त्यांनी केली. तसेच बमोर्कलान येथे महाविद्यालय, खनियाधाना येथे पोलीस चौकी आणि मोती सागर तलावाच्या सुशोभीकरणासाठी निधी देण्याचे जाहीर केले. महिलांना रोजगार देणाऱ्या उद्योगांना सरकारकडून प्रोत्साहन दिले जात आहे. अशा उद्योगांमध्ये प्रत्येक महिला कर्मचाऱ्यामागे संबंधित नियोक्त्याला दरमहा ५ हजार रुपयांचे अतिरिक्त प्रोत्साहन दिले जात असल्याचे मुख्यमंत्र्यांनी सांगितले.