पुणे : राज्यातील बहुतांशी महाविद्यालये सुरु झाली असून पुणे शहरात देखील अनेक महाविद्यालये सुरु झाली आहेत. महाविद्यालये सुरु झाल्याने महाराष्ट्राच्या विविध भागातून विद्यार्थी पुणे शहरात परतत आहे. मात्र, आता या विद्यार्थ्यांच्या निवासाचा प्रश्न निर्माण झाला आहे. शहरात सामाजिक न्याय विभागाची वसतिगृहे व पुणे महानगरपालिकेचे डॉ.बाबासाहेब आंबेडकर विद्यार्थी वसतिगृह आहे. मात्र, अद्यापही वसतिगृहे सुरु झाली नसल्यामुळे विद्यार्थ्यांच्या निवासाची प्रचंड गैरसोय होत आहे. त्यामुळे हि वसतिगृहे तात्काळ सुरु करण्यात यावी या मागणीसाठी छात्रभारती व स्टुडंट हेल्पिंग हँडस् या संघटनेच्या वतीने शुक्रवारी जिल्हाधिकारी कार्यालयासमोर आंदोलन करण्यात आले.

हे देखील पहा :

कोरोनाच्या पार्श्वभूमीवर गेल्या दोन वर्षांपासून समाजकल्याण विभागाची वसतिगृहे बंद आहेत. लॉकडाऊनच्या काळात या वसतिगृहांमध्ये कोरोना रुग्णांसाठी विलगीकरणाची सोय करण्यात आली होती. याच काळात या वसतिगृहातील विद्यार्थ्यांच्या साहित्याचे, वसतिगृहाच्या मालमत्तेचे मोठ्या प्रमाणात नुकसान झाले असून अद्यापही या साहित्यांची दुरुस्ती झाली नसल्यामुळे व समाजकल्याण विभागाच्या दिरंगाई कारभारामुळे वसतिगृह सुरु होत नसल्याचा आरोप स्टुडंट हेल्पिंग हँडस् च्या कुलदीप आंबेकर यांनी केला आहे.

वसतिगृहे बंद आहेत, समाजकल्याण विभागाकडून विद्यार्थ्यांच्या शिष्यवृत्ती अद्यापही मिळाल्या नाहीत. स्वाधार योजनेचा लाभ अद्यापही विद्यार्थ्यांना मिळालेला नाही. स्वाधार योजनेच्या पात्र लाभार्थ्यांना तात्काळ देय रक्कम त्यांच्या खात्यावर जमा करण्यात यावी, लॉकडाऊन पूर्वकाळात समाजकल्याण वसतिगृहातील विद्यार्थ्यांचे काही महिन्यांचे प्रलंबित असणारे भत्ते तात्काळ त्यांना देण्यात यावेत आदी मागण्या घेऊन विद्यार्थ्यांच्या व दोन्ही संघटनांच्या संयुक्त शिष्टमंडळाने समाज कल्याण आयुक्त प्रशांत नारनवरे यांची भेट घेऊन वरील मागण्यासंदर्भात चर्चा केली. येत्या सोमवार पर्यंत वसतिगृह सुरु करण्यासंदर्भात निर्णय न झाल्यास पुहा आंदोलन करण्यात येईल असा इशारा विद्यार्थ्यांनी दिला आहे.