संजय राठोड

यवतमाळ : नारीशक्तीने सर्वच क्षेत्रात गगन भरारी घेत स्वतःचा नाव लौकिक वाढवल्याची अनेक उदाहरणे आहेत. आत्महत्याग्रस्त यवतमाळ (Yavatmal) जिल्ह्यात पदवी पर्यंत शिक्षण घेतलेल्या लोनबेहळ (Lonbehal) येथील आरती बुटले या स्वतः टॅक्टरने (Tractor) शेती कसून पतीला कामात हातभार लावण्याचे काम करत आहे. त्यामुळे ग्रामीण भागातील चित्र पालटायला सुरूवात झाली आहे. आता ग्रामीण भागात सुद्धा पुरूषांच्या खांद्याला खांदा लावून महिला काम करित आहेत. त्यातही अद्ययावत तंत्रज्ञान हाताळण्यासाठी पुढे येतायात.

हे देखील पहा -

महिला म्हणजे चूल अन् मुल पुरता मर्यादीत कार्यक्रम असाच काही समज आजपर्यंत पुरुषप्रधान भारतीय समाजात आपण अनुभवला आहे. मात्र, कालपरत्वे यात बदल होऊन स्त्री-पुरुष समानतेला वाव मिळताना दिसतोय. लोनबेहळ येथील शेतकरी (Farmer) कुटूंबातील पदवी पर्यंत शिक्षण घेतलेल्या आरती उत्तम बुटले ह्या स्वतः गृहिणी आहेत. आपल्या पतीला मदत करण्यासाठी आरती बुटले पुढे आल्या आणि पंचवीस एकर शेतात ट्रॅक्टरच्या माध्यमातून नांगरणी, पेरणी आणि फवारणीची कामे त्या स्वतः करतात.

आरती बुटले यांनी ट्रॅक्टरने शेतीची कामे करत असल्याने महिला सक्षमीकरणाचे हे एक उत्तम उदाहरण म्हणता येईल. यवतमाळ जिल्ह्यात लाखो शेतकऱ्यांनी सततच्या नापिकीला आणि कर्जाला कंटाळून जगाचा निरोप घेतला. त्यामुळे आरती बुटले यांनी जिल्ह्यातील शेतकरी विधवा महिलांसमोर एक नवा आदर्श ठेवलाय. महिला देखील आता मागे नाही, असाच काही मेसेज आरती बुटलेंनी ट्रॅक्टर चालवून दिलाय. पंचवीस एकर शेतीत हळद, कापूस, सोयाबीन आणि तूर या पिकांची लागवड आरती यांनी स्वतः केली आहे.

Edited By : Krushnarav Sathe