औरंगाबाद - मराठवाड्यात सध्या अतिरिक्त उसाचा प्रश्न गंभीर झाला आहे. आपला ऊस कारखान्याने लवकर न्यावा म्हणून शेतकरी (Farmer) आटापिटा करत आहेत. आजही हजारो शेतकऱ्यांचा ऊस शेतात तसाच उभा आहे. पावसाळ्याच्या तोंडावर त्या शेतकऱ्यांची चिंता अधिक वाढली आहे. तर दुसरीकडे ऊस कारखान्याने ऊस नेल्यानंतर शेतकऱ्याच्या आनंदाला पारावार उरला नसल्याचं असं चित्र समोर आलं आहे.

हे देखील पाहा -

कारखान्यांनी ऊस घेऊन गेल्यानंतर जग जिंकल्याचा आनंद शेतकऱ्यांच्या चेहऱ्यावर दिसून येत आहे. त्यामुळे पैठण तालुक्यातील चांगतपुरी इथं शेतकऱ्यांनी डीजे लावून फटाक्यांची आतिषबाजी करून जल्लोष साजरा केला. ऊस तोडणी साठी मजूर मिळत नसल्यामुळे आणि कारखाने तोडणीला माणसं पाठवत नसल्यामुळे शेतकरी हतबल झाला होता, त्यातून सुटका करण्यासाठी चांगतपुरी येथील नवनाथ गीते यांच्या ऊसतोडणी यंत्राने 33 हजार टन एवढा विक्रमी ऊस तोडला.

या मशीनमुळे पंचक्रोशीतील शेतकऱ्यांचा ऊस गाळप होऊ शकला आणि शेतकरी अतिरिक्त उसाच्या संकटातून सुटले म्हणून अख्खा गाव डीजे लावून ऊसतोडणी मशीनसमोर आनंद साजरा केला. इतकंच नाही तर हंगाम संपताच चांगतपूरी ग्रामस्थांनी डिजे लावून गावातून मशीनची अशी जंगी मिरवणूक काढली. या आनंदावरूनच लक्षात येते की अतिरिक्त उसामुळे शेतकरी किती त्रास होते. आता असाच आनंद मराठवाड्यातल्या गावा गावातील शेतकऱ्यांना व्हावा इतकी अपेक्षा.