परभणी : खरीप हंगामातील उडीद, मुगाची काढणी कधीच झाली आहे. आता सोयाबीन काढणीला सुरवात झाली असून शेतकरी विक्रीसाठी मार्केटमध्ये आणत आहेत. या दृष्टीने जिल्ह्यातील नाफेडच्या आठ केंद्रांवर खरेदी सुरु करण्यात येणार असून सोयाबीन खरेदीला १५ ओक्टोम्बरपासून सुरवात केली जाणार आहे. 

राज्यात नाफेड मार्फत १९ जिल्ह्यांत हमीभाव खरेदी केंद्र सुरू केले जाणार असून, एनसीसीएफकडून ७ जिल्ह्यांमध्ये हमीभावाने मालाची खरेदी केली जाणार आहे. यामध्ये (parbhani News) परभणी जिल्ह्यात नाफेडच्या खरेदी केंद्रांचा समावेश राहणार आहे. मूग, उडीद व सोयाबीनच्या खरेदीसाठी शेतकऱ्यांना नोंदणीसाठी १ ऑक्टोबरपासूनच सुविधा उपलब्ध करून दिली आहे. यामुळे शेतकऱ्यांना (Farmer) नोंदणी करण्याचे आवाहन केले जात आहे. काही शेतकऱ्यांनी नोंदणी देखील केली आहे. 

परभणी जिल्ह्यात शासनाच्या हमीभावानुसार नाफेडकडून मूग, उडदाची खरेदी १० ऑक्टोबरपासून होणार आहे. तर सोयाबीनची खरेदी १५ ऑक्टोबरपासून केली जाणार आहे. यासाठी जिल्ह्यात ८ ठिकाणी केंद्रांना मंजुरी दिलेली आहे. यामुळे शेतकऱ्यांना या केंद्रांवर चांगला भाव मिळेल अशी अपेक्षा आहे.