परभणी: जनावरांमध्ये होणाऱ्या लम्पी स्किनच्या (Lumpy skin) संकटातून शेतकरी सावरत असतानाच परतीच्या पावसाने धुमाकूळ घालतल्यामुळे खरिप पिकाचा हातातोंडाशी आलेला घास हिरावून घेतला आहे. त्यामुळे बळीराजावरील संकटात काही कमी होत असतानाच आता पुन्हा शेतकऱ्यांवर वेगळं विचित्र संकट आलं आह़े.

परभणीमधील (Parbhani) सेलु तालुक्यातील शिराळा या गावामधील एका शेतकऱ्यावर विचित्र आणि तितकेच भयानक संकट आलं आहे. शेतकऱ्याच्या बैलांची जीभ रात्रीत रक्तस्राव होत गळून पडल्याच्या धक्कादायक बातमी समोर आली आहे. शिराळा गावातील जवळपास अकरा बैलांची जीभ गळून पडल्याने शेतकऱ्यांमध्ये भीतीचे वातावरण पसरलं आह़े.

मिळालेल्या माहितीनुसार, रात्री बैल (Bull) गोठ्यात बांधल्यावर चांगला होता टाकलेली वैरण ही खात होता, सकाळी पाहिले तर तोंडातून रक्तस्राव होत जीभ गळून पडल्याचे शेतकऱ्यांना आढळून आले. पशूवैद्यकिय डॉक्टरांनी तपासणी केल्यावर असा प्रकार पहिल्यांदाच पहावयास मिळत असल्याचे निदान केले आह़े.

पशूवैद्यकिय डॉक्टरांनी बैलांच्या तुटलेल्या जीभ तपासणीसाठी पाठवल्या असून त्यांचा रिपोर्ट येणे बाकी आहे. असा प्रकार केवळ बैलांच्या बाबतीत होत असून गाय (Cow) किंवा म्हशी मध्ये नसल्याचे दिसून आले आह़े.अशा विचित्र प्रकाराने शेतकऱ्यांत भीतीचे वातावरण असून ह्याचे योग्य निदान करण्याची मागणी होत आहे.

Edited By - Jagdish Patil