अमळनेर (जळगाव) : येथून जवळच असलेल्या मांडळ येथे शेतात वीज कोसळून शेतकरी (Farmer) जागीच ठार झाला. तर त्याच्या कुटुंबातील चौघे जखमी झाले. ही घटना गुरुवारी (ता. ६) दुपारी साडेतीनच्या सुमारास घडली. (Jalgaon News Lightning Strike Farmer Death)

अमळनेर तालुक्‍यातील भरवस, मुडी, मांडळ परिसरात गुरुवारी (६ ऑक्‍टोंबर) दुपारी विजांच्या कडकडाटासह परिसरात जोरदार पाऊस (Rain) झाला. यावेळी आनंदा सुरेश कोळी (वय ३५) हे कुटुंबासह मांडळ शिवारातील शेतात काम करीत होते. विजांच्या कडकडाट (Lightning Strike) सुरू होताच ते झाडाच्या आडोशाला गेले. मात्र त्याचवेळी वीज कोसळल्याने आनंदा कोळी यांचा होरपळून जागीच मृत्यू झाला.

पत्‍नी, मुले जखमी

सोबत असलेली त्यांची पत्नी प्रतिभा कोळी (वय ३०), मुलगा राज कोळी (वय ९) व प्रशांत कोळी (वय ६) तसेच सासू लटकन कोळी (वय ६०) हे चारही जण जखमी झाले. कोळी कुटुंब हे मूळचे बोराडी (ता. शिरपूर, जि. धुळे) येथील असून, मजुरीसाठी मांडळ येथे स्थलांतरित झाले आहे. जखमींना अमळनेर ग्रामीण रुग्णालयात दाखल केले असून, मारवाड पोलिस ठाण्याचे सहाय्यक निरीक्षक जयेश खलाणे यांच्या मार्गदर्शनाखाली भारत ईशी तपास करीत आहेत.