Maval News : मावळात भाताच्या बोगस बियांणाची विक्री झाल्याची तक्रार शेतकरी करु लागले आहेत. यामध्ये शेतकऱ्यांचे लाखो रुपयांचे नुकसान झाल्याचे सांगण्यात येत आहे. तरी दोषींवर कारवाई करून शेतकऱ्यांना नुकसान भरपाई द्यावी अशी मागणी जाेर धरु लागली आहे. (Maharashtra News)

राज्यात बोगस बियाणांचा सुळसुळाट सुरू असतानाच सुजलाम सुफलाम असणाऱ्या भाताच्या आगारातील मावळ तालुक्यात देखील बोगस बियांण विक्री केल्याचा प्रकार उघडकीस आला आहे.

मावळातील कुसगाव पमा याठिकाणी संतोष तापकीर यांनी (एका नामवंत कंपनीचे) इंद्रायणी भाताचे बीज घेतले होते. मात्र आता भात लागवड होऊन त्याला फुटवे फुटायला लागल्यावर ते निकृष्ट असल्याचे निदर्शनास आले. हाताशी आलेले पीक हे निकृष्ट दर्जाचे असल्याचे निदर्शनास आल्यानंतर शेतकऱ्यांचे मोठे नुकसान झाले आहे.

याबाबत तालुका कृषी अधिकारी दत्ता पडवळ यांच्याशी शेतकऱ्यांनी संपर्क साधल्यानंतर पंचनामा करण्यात आला. परंतु 10 एकर मध्ये घेतलेल्या पिकांचे नुकसान हे केवळ बोगस बियाणांमुळे झाल्याचा आरोप शेतकऱ्यांनी केला आहे. तर अशा बोगस बियाणे विक्री करणाऱ्या आणि त्यांच्याविरुद्ध कारवाई न करणाऱ्या कृषी अधिकारी आणि दोषी असलेल्यावर कारवाई करण्याची मागणी शेतकऱ्यांनी केली आहे.

याबाबत तालुका कृषी अधिकारी यांनी मात्र बियाणे बोगस नसून वातावरणामध्ये बदल होत असल्याने पिकांवर परिणाम झाल्याचे सांगितले. त्याचप्रमाणे शेतकऱ्यांच्या बांधावर जाऊन कमिटीने पंचनामे करून त्याचा अहवाल येणाऱ्या काही दिवसांत देणार असल्याचे सांगितले.

Edited By : Siddharth Latkar