धुळे : शेतात कोळपणीचे काम सुरु असताना शेतात तुटून पडलेल्या विजेच्या तारेला स्पर्श झाल्याने बैलाचा मृत्यू झाला आहे. तर शेतात मशागत करणाऱ्या तीघा जणांना देखील या विजेच्या तारेचा स्पर्श झाल्यामुळे मोठा झटका बसला. मात्र बैलाच्या मृत्यूने शेतकऱ्याचे मोठे नुकसान झाले आहे. 

पावसाने सध्या उघडीप दिली आहे. यामुळे शेतात वखरणी, कोळपणीचे काम सुरु आहे. या दरम्यान शिरपूर (Shirpur) तालुक्यातील खर्दे शेतशिवारात दुर्दैवी घटना घडली आहे. दुपारच्या सुमारास शेतकरी आपल्या शेतात कोळपणी करत असताना शेतातून गेलेली विजेची तार अचानक तुटून खाली पडली होती. यात विद्युत प्रवाह सुरू असलेल्या या विजेच्या तारेला बैलाचा स्पर्श (Electric Shock) झाला. यामध्ये बैलाचा जागीच मृत्यू झाला. शेतकऱ्याच्या या नुकसानीला वीज वितरण विभागाचा गलथान कारभार जिम्मेदार असल्यामुळे वीज वितरण विभागाने शेतकऱ्याच्या या नुकसानीची दखल घेत, शेतकऱ्याला लवकरात लवकर नुकसान भरपाई मिळवून द्यावी अशी मागणी नुकसानग्रस्त शेतकऱ्यातर्फे करण्यात आली आहे.

सुदैवाने तिघे बचावले 

विजेची तार तुटून पडली असल्याने ती दिसून आली नाही. यामुळे कोळपणी करत असताना पुढे असलेल्या बैलाचा स्पर्श झाला. लोखंडी वखर असल्याने मागे मशागतीसाठी असलेल्या तिघांना देखील विजेचा जोरदार झटका बसला. या झटक्याने तिघे जण बाजूला फेकले गेल्यामुळे सुदैवाने त्यांचा जीव बचावला आहे.