बालाजी सुरवसे 

धाराशिव : यंदाच्या हंगामात सुरवातीपासून पाऊस सातत्याने सुरु राहिला. यामुळे पिकांवर यांचा परिणाम झाल्याचे पाहण्यास मिळाले. दरम्यान आता मागील आठवड्यापासून पावसाने काही प्रमाणात उघडीप दिली आहे. मात्र सोयाबीन पिकावर मोठ्या प्रमाणावर बुरशीजन्य करपा रोगाचा प्रादुर्भाव पडल्याचा दिसून येत आहे. 

धाराशिव (Dharashiv News) जिल्ह्यात मोठ्या प्रमाणात सोयाबीनची लागवड करण्यात आली आहे. अनेक भागात सोयाबीनला फुल आणि शेंगा लागण्याच्या वेळेस पावसाची संततधार सुरु असल्याने शेंगांचा लाग कमी झाला. दरम्यान आता पावसाने उघडीप दिली आहे. यामुळे कपाशी. ज्वारी या पिकांची वाढ होण्यास चांगले वातावरण निर्माण झाले आहे. मात्र (Soyabean Crop) सोयाबीन पिकावर याचा परिणाम झाल्याचे पाहण्यास मिळत आहे. सततच्या पावसानंतर ऊन पडत असल्याने सोयाबीनवर रोगाचा प्रादुर्भाव पडल्याचे पाहण्यास मिळत आहे.  

उत्पादनात घट होण्याची भीती 

धाराशिव जिल्ह्यातील शेतकऱ्यांचे खरीपातील प्रमुख पिक असलेल्या सोयाबीन पिकावर तुळजापूरसह धाराशिव भागात बुरशीजन्य करपा रोगाचा प्रादुर्भाव झाला आहे. त्यामुळे उत्पादनात घट होवुन सोयाबीनच्या शेंगा बियांची फुगवण न झाल्याने वाळुन गेल्या आहेत. एकीकडे सततच्या पावसामुळे नुकसान झाले असताना करपा रोगाचा प्रादुर्भावामुळे शेतकऱ्यांसमोर संकट उभे राहीले असुन शासनाने पंचनामे करुन मदत देण्याची मागणी शेतकऱ्यांतुन केली जात आहे.