बुलढाणा : शेगाव पंचायत समितीचे माजी उपसभापती तसेच प्रयोगशील (Farmer) शेतकरी पुंडलिक पारस्कार (वय ४९) यांची शेतात गळफास लावून आत्महत्या केल्याची धक्कादायक घटना उघडकीस आली आहे. शेगाव (Shegaon) तालुक्यातील पहुरजीरा येथे ही दुर्देवी घटना घडली. (Latest Marathi News)

गेल्या काही वर्षांपासून शेती ही सातत्याने तोट्यात जात असून नापिकी व बँका तसेच खासगी कर्जामुळे पुंडलिक पारस्कार हे त्रस्‍त होते. त्यामुळे नैराश्यात गेल्याने त्यांनी पहुरजीरा येथील शेतात लिंबाच्या झाडाला गळफास घेऊन आत्महत्या केली. या घटनेची माहिती कळताच गावकरी व पोलिसांनी तातडीने घटनास्थळी घाव घेतली. पारस्कार यांच्या पश्च्यात आई, पत्नी, तीन मुली व बराच मोठा आप्तपरिवार आहे.

काही काळ राहिले उपसभापती

काहीकाळ त्यांनी शेगाव पंचायत समितीचे उपसभापती म्हणूनही काम पाहिले होते. अत्यंत मनमिळावू स्वभाव व कष्टाळू शेतकरी म्हणूनही ते सर्वदूर परिचित होते. त्यांच्या आत्महत्येने परिसरात हळहळ व्यक्त होत आहे. राज्य सरकारने त्यांच्या कुटुंबीयास तातडीने आर्थिक मदत करावी अशी मागणी होत आहे