बीड : कांदा काढणी झाल्यानंतर शेतकऱ्याने व्यापाऱ्याला कांदा विक्री केला होता. हा कांदा विक्रीचे पैसे व्यापाऱ्याकडून घेणे होतें. विक्री केलेल्या कांद्याचे पैसे मागायला गेलेल्या शेतकरी संतोष वाडेकर यांना गावातील कांदा व्यापाऱ्याकडून मारहाण केल्याची धक्कादायक आणि संतापजनक घटना घडल्याचं समोर आलं आहे. 

बीडच्या (Beed News) आष्टी तालुक्यात असणाऱ्या खरडगव्हाण येथे हा संतापजनक प्रकार घडलाय. आष्टी (Ashti) तालुक्यातील खडरडगव्हाण येथील शेतकरी संतोष पोपट वाडेकर व विष्णू सुभाष वाडेकर यांनी एक वर्षापूर्वी गावातील कांदा व्यापारी प्रल्हाद केरु नरवडे यांना आपला कांदा दिला होता. व्यापारी प्रल्हाद नरवडे यांनी काही पैसे दिले. मात्र अद्याप ४१ हजार रुपये बाकी आहेत. ते पैसे मागण्यासाठी (Farmer) शेतकरी संतोष पोपट वाडेकर व विष्णू सुभाष वाडेकर हे त्यांच्या घरी गेले आसता त्यांनाच मारहाण केली गेली. त्यानंतर आपल्या पोलीस नातेवाईकांच्या मदतीने शेतकऱ्यांवरच गुन्हा दाखल केला. 

शेतकऱ्याला अश्रू अनावर 

या प्रकारामुळे शेतकरी भयभित झाले असून सरकारने आम्हा शेतकऱ्यांना न्याय द्यावा; अशी मागणी शेतकरी संतोष वाडेकर, विष्णू वाडेकरसह महिला शेतकऱ्याने केली आहे. आपली व्यथा सांगताना महिला शेतकऱ्याला अश्रू अनावर झाले. दरम्यान पीडित शेतकऱ्याच्या फिर्यादीवरून व्यापाऱ्यासह सहा जणांवर अंभोरा पोलीस ठाण्यात गुन्हा दाखल झाला आहे.