अमर घटारे 
अमरावती : पावसाचा खंड पडल्याने विमा परताव्याचे २५ टक्के अग्रीम देण्याची अधिसूचना जारी झाली असली तरी नुकसानग्रस्त शेतकऱ्यांना (Farmer) अल्प परतावा मिळणार आहे. विमा कंपनीने नुकसानीच्या अहवालावर (Amravati) आक्षेप घेण्यास सुरुवात केली असून अधिकाधिक पंचनामे फेटाळण्यावर त्यांचा जोर आहे. सरासरी एकरी १६५० रुपये अग्रीम मिळण्याची शक्यता आहे. (Latest Marathi News)

अमरावती जिल्ह्यातील ७ तालुक्यांतील ४१ महसूल मंडळात पावसाने खंड दिल्याने सरासरीच्या ५० टक्के पेक्षा कमी उत्पादन होण्याचा अहवाल जिल्ह्याच्या संयुक्त समितीने दिला आहे. महिनाभरात २५ टक्के अग्रिमची रक्कम शेतकऱ्यांच्या खात्यात जमा करण्याचे बंधनकारक आहे. मात्र विमा कंपनीने (Insurance Company) संयुक्त समितीच्या अहवालावर आक्षेप दाखल करण्यास सुरुवात केली आहे. 

या आक्षेपात नुकसानीची काढलेली सरासरी मान्य नसल्याचा त्यांचा आक्षेप आहे. आता या आक्षेपावर जिल्हा अधीक्षक कृषी अधिकाऱ्यांकडे सुनावणी करण्यात येईल. त्यानंतरही आक्षेप कायम राहिल्यास राज्यस्तरावर आक्षेप दाखल करण्यात येतील. तेथील निर्णय काय येतो, यावर अग्रीम देणे अवलंबून राहणार आहे. या प्रक्रियेत बराच कालावधी निघून जाणार आहे.