शिवराज्याभिषेक सोहळा: डोळे दिपवणारा उत्सव, रायगडावर उसळला शिवसागर

किल्ले रायगडावर आजच्याच दिवशी म्हणजे ६ जून १६७४ ला छत्रपती शिवरायांचा राज्याभिषेक पार पडला होता. हा सोहळा तब्बल ९ दिवस चालला होता.

छत्रपती शिवराय व राजर्षी छत्रपती शाहू महाराज यांचे वारसदार युवराज संभाजी छत्रपती महाराज यांच्या मार्गदर्शनाखाली अखिल भारतीय शिवराज्याभिषेक महोत्सव समितीतर्फे किल्ले रायगडावर हा सोहळा मोठ्या उत्साहात साजरा झाला.

युवराज संभाजी छत्रपती महाराज व युवराजकुमार शहाजीराजे छत्रपती यांचे भव्य स्वागत करण्यात आले. शिवभक्तांच्या समवेत त्यांनी पायी गड चालण्यास प्रारंभ केला.

यावर्षी कोरोनाचे कोणतेही निर्बंध नसल्याने आज लाखोंच्या संख्येने शिवभक्त रायगडावर दाखल होत मोठ्या जल्लोषात राज्याभिषेकाचा सोहळा पार पडला.

संभाजी राजे छत्रपती यांच्या हस्ते, युवराजकुमार शहाजी छत्रपती आणि लाखो शिवभक्तांच्या उपस्थितीत हा सोहळा मोठ्या उत्साहात पार पडला.

ढोल-ताशा आणि तुतारीच्या गजरात जल्लोष करण्यात आला. ढोल-ताशाच्या गजरात तलवारी आणि भगवे झेंडे नाचवत शिवप्रेमींनी हा उत्सव साजरा केला.

यावेळी युवराज संभाजीराजे छत्रपती यांसह युवराजकुमार शहाजी छत्रपती हे या सोहळ्याला उपस्थित होते.

पारंपरिक लोककलांचा मिरवणुकीत जागर घालण्यात आला.

गडदेवता शिरकाई देवीचा गोंधळ झाले. जगदीश्वराचे वारकरी संप्रदायाकडून कीर्तन, जागर व काकड आरती झाली.