Surabhi Jayashree Jagdish
इंटरनेटवरील पहिली वेबसाइट info.cern.ch होती. ही वेबसाइट 6 ऑगस्ट 1991 रोजी सर्वसामान्यांसाठी उपलब्ध करण्यात आली. जगभरातील युजर्सना वर्ल्ड वाइड वेबची माहिती देणारी ही पहिली अधिकृत वेबसाइट मानली जाते.
ब्रिटिश संगणकशास्त्रज्ञ Tim Berners-Lee यांनी ही वेबसाइट तयार केली. ते त्या वेळी CERN या युरोपियन संशोधन संस्थेत कार्यरत होते. त्यांनी वर्ल्ड वाइड वेबची संकल्पना विकसित करून इंटरनेटच्या इतिहासात मोठी क्रांती घडवून आणली
या वेबसाइटचा उद्देश वर्ल्ड वाइड वेब म्हणजे काय हे लोकांना समजावून सांगणं हा होता. वेबसाइटवर वेब सर्व्हर कसा तयार करायचा, वेब पेज कसे बनवायचे आणि वेबचा वापर कसा करायचा याची माहिती देण्यात आली होती.
पहिल्या वेबसाइटवर फक्त मजकूर होता. त्यामध्ये कोणतेही फोटो, रंगीत डिझाइन किंवा ग्राफिक्स नव्हते. त्या काळातील मर्यादित तंत्रज्ञानामुळे वेबसाइट अत्यंत साध्या स्वरूपात तयार करण्यात आली होती.
वर्ल्ड वाइड वेबमुळे इंटरनेटचा वापर अधिक सोपा आणि सर्वांसाठी खुला झाला. माहिती शोधणं, वाचणं आणि जगभरात शेअर करणं यासाठी एकसंध व्यासपीठ उपलब्ध झालंय. यामुळे पुढे लाखो नव्हे तर अब्जावधी वेबसाइट्स, सर्च इंजिन्स आणि ऑनलाइन सेवा उपलब्ध झाल्या.
ही वेबसाइट इंटरनेटच्या आधुनिक युगाची सुरुवात मानली जाते. ऑनलाइन माहितीचं आदान-प्रदान अधिक वेगवान आणि सुलभ करण्यासाठी तिने महत्त्वाची भूमिका बजावली. आजच्या ई-कॉमर्स, सोशल मीडिया, ऑनलाइन शिक्षण आणि डिजिटल सेवांचा पाया या सुरुवातीच्या वेबसाइटमुळेच घातला गेला.
info.cern.ch ही वेबसाइट इंटरनेटच्या इतिहासातील एक ऐतिहासिक वेबसाईट म्हणून ओळखली जाते. ती वर्ल्ड वाइड वेबच्या सुरुवातीची साक्ष देणारी आणि डिजिटल क्रांतीचा पाया घालणारी वेबसाइट आहे.