Surabhi Jayashree Jagdish
कार दोन चाकी असो किंवा चार चाकी, तिच्या प्रवासात टायर महत्त्वाची भूमिका बजावतात. टायरमुळे गाडीला रस्त्यावर ग्रिप मिळते आणि ती चालवणं सोपं होतं. चांगल्या स्थितीतील टायरमुळे प्रवास अधिक सुरक्षित होण्यास मदत होते.
नवीन गाडी घेताना किंवा जुने टायर बदलताना अनेकांना ट्यूब टायर आणि ट्यूबलेस टायर यांपैकी कोणता निवडावा, असा प्रश्न पडतो. दोन्ही प्रकारच्या टायरचे काही फायदे आणि मर्यादा आहेत. त्यामुळे टायर निवडताना त्याची किंमत, सुरक्षितता आणि दुरुस्तीची सोय या गोष्टी लक्षात घ्याव्यात.
ट्यूब टायरच्या आत हवा भरण्यासाठी रबराची वेगळी ट्यूब असते. ट्यूबलेस टायरमध्ये अशी वेगळी ट्यूब नसते आणि टायर आणि चाकाच्या रिममधील बंदिस्त जागेत हवा भरली जाते. त्यामुळे या दोन्ही टायरमध्ये हवा साठवण्याची पद्धत वेगळी असते.
ट्यूब टायरमध्ये हवा एका रबराच्या ट्यूबमध्ये भरली जाते. ट्यूबलेस टायरमध्ये टायरचा आतील थर आणि रिम यांच्यामध्ये हवा बाहेर जाऊ न देणारा जोड तयार होतो. हा जोड योग्य प्रकारे बंद असेल तर टायरमधील हवा टिकून राहते.
ट्यूब टायरला खिळा लागल्यास आतील ट्यूबला छिद्र पडू शकतं आणि हवा बाहेर जाऊ शकते. ट्यूबलेस टायरला खिळा लागल्यास अनेकदा हवा हळूहळू बाहेर पडते त्यामुळे गाडी सुरक्षित ठिकाणी थांबवण्यासाठी वेळ मिळू शकतो.
ट्यूब टायरचं पंक्चर दुरुस्त करण्यासाठी अनेकदा चाक काढून त्यातील ट्यूब बाहेर काढावी लागते. ट्यूबलेस टायरचं छोटं पंक्चर योग्य ठिकाणी असल्यास टायरमधून खिळा काढून दुरुस्तीची स्ट्रिप वापरता येते.
ट्यूबलेस टायरमध्ये वेगळी ट्यूब नसल्यामुळे त्याचं वजन काही वेळा कमी असू शकतं. पण वजन टायरच्या प्रकारावर अवलंबून असते. टायरचं लाईफ आणि गाडीचं मायलेज हे टायरचा दर्जा, हवेचा योग्य दाब, रस्त्याची स्थिती आणि गाडी चालवण्याची पद्धत यांवरही अवलंबून असतं.