Sakshi Sunil Jadhav
उन्हाळ्याच्या सुट्ट्यांमध्ये बऱ्याचदा सर्वजण लांब-लांब डोंगराळ भागात फिरायला जातात. तिथे घाटाचे रस्ते, बदलतं हवामान आणि लांबचा प्रवास यात भरपूर अडचणी येऊ शकतात.
तुमचा प्रवास सुरक्षित आणि आरामदायी करण्यासाठी काही आवश्यक गोष्टी कारमध्ये असणं गरजेचं आहे. त्यासाठी पुढील माहिती एकदा वाचून घ्या.
डोंगराळ भागात उन्हाच्या दिवसांमध्ये अचानक थंडी किंवा पावसाचा सामना करावा लागू शकतो. त्यामुळे हलकं जॅकेट, स्वेटर आणि रेनकोट कारमध्ये ठेवा.
प्रवासादरम्यान सर्व ठिकाणी हॉटेल किंवा दुकान उपलब्ध असेलच असं नाही. पाण्याच्या बाटल्या, बिस्किटं, ड्रायफ्रूट्स किंवा इतर हलके खाण्याचे पदार्थ सोबत ठेवल्याने अडचण येत नाही.
आरसी बुक, विमा, ड्रायव्हिंग लायसन्स आणि पीयूसी प्रमाणपत्र यांची तपासणी करूनच प्रवासाला निघा. आवश्यक कागदपत्रांच्या डिजिटल प्रती मोबाईलमध्ये सेव करून ठेवणंही फायदेशीर ठरेल.
डोंगराळ किंवा दुर्गम भागात अनेकदा ऑनलाइन पेमेंटची सुविधा उपलब्ध नसते. अशावेळी थोडी रोख रक्कम जवळ असेल इंधन, अन्न किंवा इतर खर्च भागवणं सोपं होतं.
प्रवासात नेहमी संपर्कासाठी मोबाईलसोबत ठेवाच. पूर्ण चार्ज असलेली पावर बँक आणि कार चार्जर सोबत ठेवा.
घाटाच्या रस्त्यावर किंवा दुर्गम भागात रात्री प्रकाशाची कमतरता असू शकते. अशावेळी टॉर्च किंवा रिचार्जेबल इमर्जन्सी लाईटसोबत ठेवणं फायद्याचं ठरू शकतं.
प्रवासादरम्यान किरकोळ दुखापत, डोकेदुखी किंवा मळमळ यांसारख्या समस्यांना सामोरं जावं लागू शकतं. त्यामुळे प्राथमिक उपचारांसाठी आवश्यक औषधं आणि साहित्य असलेले फर्स्ट एड किट कारमध्ये ठेवा.