Shreya Maskar
श्रावण महिन्यात एकदा तरी मुंबई जवळ असलेल्या शंकराच्या मंदिराला भेट द्या. परदेशी पर्यटकही येथे येतात. हे मंदिर वास्तुकलेचा अद्भूत नजारा आहे.
ऐतिहासिक श्री अंबरेश्वर शिव मंदिर हे महाराष्ट्रातील अंबरनाथ (पूर्व) येथील प्रकाश नगरमधील 'शिव मंदिर रोड'वर वसलेले आहे. हे मंदिर वालधुनी नदीच्या काठावर वसलेले असून अंबरनाथ रेल्वे स्थानकापासून साधारण २ किलोमीटर अंतरावर आहे.
अंबरनाथ शिव मंदिर हे ११ व्या शतकातील दगडी वास्तुकला, जमिनीखालील गाभारा आणि आकाशाकडे उघडे असलेले शिखर, जिथे मुख्य शिवलिंगाच्या अगदी वरून आकाश (अंबर) थेट दिसते यासाठी प्रसिद्ध आहे.
अंबरनाथ शिव मंदिर इसवी सन १०६० मध्ये शिलाहार राजवटीत राजा चित्तराज याने बांधण्यास सुरुवात केली आणि त्याचा मुलगा मुम्मुनी याने ते पूर्ण केले.
मंदिराचा गाभारा जमिनीच्या पातळीपासून सुमारे २० पायऱ्या खाली आहे. मंदिराचे मुख्य शिखर अपूर्ण आहे, ज्यामुळे मध्यभाग आकाशाकडे उघडा राहिला आहे; याच वैशिष्ट्यामुळे या देवतेला 'अंबरेश्वर' (आकाशाचा स्वामी) हे नाव मिळाले आहे.
काळ्या बेसाल्ट दगडापासून बनलेल्या बाह्य भागावर शिव, विष्णू, ब्रह्मा आणि सूर्य यांसारख्या हिंदू देवतांची अत्यंत सुंदर आणि बारकाव्यांसह केलेली शिल्पे आहेत. या मंदिराच्या प्रवेशद्वारावर नंदीच्या दोन मूर्ती आहेत.
अंबरनाथ शिव मंदिरात महाशिवरात्री आणि श्रावण महिन्यातील सोमवारी भाविकांची तुफान गर्दी पाहायला मिळते. या काळात मंदिरात मंगलमय वातावरण पाहायला मिळते.
वरील माहितीचा उद्देश केवळ ऐतिहासिक वारसा आणि पर्यटन स्थळांची ओळख करून देणे हा आहे. यातील माहिती इंटरनेटवरील उपलब्ध सोर्समधून घेण्यात आली. कोणत्याही ऐतिहासिक वादाशी किंवा दाव्याशी आमचा संबंध नाही.
श्रावण महिन्यात एकदा तरी मुंबई जवळ असलेल्या शंकराच्या मंदिराला भेट द्या. परदेशी पर्यटकही येथे येतात. हे मंदिर वास्तुकलेचा अद्भूत नजारा आहे.