Shreya Maskar
मुंबई स्टाइल पावभाजी बनवण्यासाठी बटाटे, फुलकोबी,हिरवे वाटाणे, गाजर, कांदा, टोमॅटो, ढोबळी मिरची, आले-लसूण पेस्ट , पाव भाजी मसाला, लाल मिरची पावडर, हळद , लिंबाचा रस, बटर , तेल, कोथिंबीर आणि मीठ इत्यादी साहित्य लागते.
पावभाजी बनवण्यासाठी सर्वप्रथम बटाटे, फुलकोबी, गाजर आणि वाटाणे प्रेशर कुकरमध्ये थोडे मीठ आणि एक कप पाण्यासोबत २-३ शिट्ट्या होईपर्यंत उकळवा. कुकर थंड झाल्यावर भाज्या मॅशरने चांगल्या प्रकारे मॅश करा.
एका मोठ्या पॅनमध्ये चमचा तेल आणि बटर गरम करा. त्यात बारीक चिरलेला कांदा घालून हलका तपकिरी होईपर्यंत परता. आले-लसूण पेस्ट आणि बारीक चिरलेली शिमला मिरची घालून २ मिनिटे शिजवा.
पॅनमध्ये चिरलेले टोमॅटो आणि थोडे मीठ घालून टोमॅटोमधून तेल सुटेपर्यंत परता. त्यानंतर हळद, लाल मिरची पावडर आणि पाव भाजी मसाला घाला. बटर पॅनच्या कडेला सुटेपर्यंत मंद आचेवर मसाले परता.
मॅश केलेल्या भाज्या भाजलेल्या मसाल्यांमध्ये घालून चांगले मिसळा. भाजी थोडी घट्ट होईल, म्हणून आवश्यकतेनुसार पाणी घाला. आता, मसाले आणि भाज्या चांगल्या प्रकारे एकत्र होण्यासाठी पॅनमध्येच मॅशरने भाजी पुन्हा २-३ मिनिटे मॅश करा.
मंद आचेवर ५-१० मिनिटे भाजी शिजू द्या. शेवटी लिंबाचा रस, हिरवीगार कोथिंबीर आणि तूप टाकून गॅस बंद करा. गरमागरम भाजी तयार आहे.
शेवटी तव्यावर तूप टाकून त्यावर थोडी बारीक चिरलेली कोथिंबीर आणि चिमूटभर पाव भाजी मसाला भुरभुरा. पाव अर्धा कापून तव्यावर ठेवा आणि दोन्ही बाजूंनी फ्राय करा.
अशाप्रकारे मुंबई स्पेशल झणझणीत पावभाजी तयार झाली आहे. बटर, कांदा आणि लिंबाच्या फोडीने पावभाजी सजवा.