Shreya Maskar
मिस्सी रोटी प्रामुख्याने उत्तर भारतात, विशेषतः पंजाब आणि राजस्थानमध्ये बनवली जाणारी एक पारंपारिक आणि पौष्टिक चपाती आहे. ही अनेकदा तंदूर किंवा तव्यावर भाजली जाते.
मिस्सी रोटी बनवण्यासाठी लाल तिखट, हळद, धणे पूड, हिरवी मिरची, कांदा, कसुरी मेथी, तेल, मीठ आणि कोथिंबीर इत्यादी साहित्य लागते.
मिस्सी रोट बनवण्यासाठी एका भांड्यात दीड कप बेसन आणि एक कप गव्हाचे पीठ घ्या. दोन्ही पीठ एकत्र मिक्स करा.
पीठात लाल तिखट, हळद, धणे पूड, हिंग, मीठ, हिरव्या मिरचीची पेस्ट, बारीक चिरलेला कांदा घालून चांगले मिक्स करा. लक्षात घ्या सर्व मसाले पिठाला लागले पाहिजेत.
त्यानंतर मिश्रणात हिरवीगार बारीक चिरलेली कोथिंबीर, कसुरी मेथी आणि तेल घालून एक कणीक मळून घ्या.
कणीक मळण्यासाठी यात आवश्यकतेनुसार पाणी घालून मऊ पीठ मळा. तयार पीठ चांगले मुरण्यासाठी ५ ते १० मिनिटे झाकून ठेवून द्या.
आता, पीठाचे छोटे गोळे बनवा आणि रोटीप्रमाणे लाटा. रोटीच्या एका बाजूला थोडे पाणी लावा आणि ती बाजू गरम तव्यावर ठेवा. जेव्हा रोटी थोडी फुगू लागेल, तेव्हा तवा धरून थेट गॅसवर चपाती भाजून घ्या. जेव्हा रोटी पूर्णपणे शिजेल तेव्हा काढा.
शेवटी मिस्सी रोटीला बटर लावून तिचा आस्वाद घ्या. तुम्ही मिस्सी रोटी डाळ मखनी, मटार पनीर किंवा तुमच्या आवडीच्या रस्सा भाजीसोबत खा.