ब्युरो रिपोर्ट, साम टीव्ही, मुंबई
मराठी चित्रपटसृष्टीतील ज्येष्ठ अभिनेत्री वर्षा उसगांवकर यांना मोठा धक्का बसला आहे.
मिडिया रिपोर्टनुसार, वर्षा उसगांवकर यांची लाखो रुपयांची फसवणूक झाल्याचा धक्कादायक प्रकार समोर आला आहे.
अभिनेत्री वर्षा उसगांवकर आणि मृणालिनी जांभळे यांच्यासह इतर अभिनेत्रींची एकूण जवळपास 47लाख रुपयांची फसवणूक झाली आहे.
या प्रकरणी अविनाश जाधव याच्यावर फसवणुकीचा गुन्हा दाखल झाला असून, शिवाजी पार्क पोलीस स्टेशनमध्ये तक्रार नोंदवण्यात आली आहे.
पोलिसांकडून मिळालेल्या माहितीनुसार,तक्रारदार मृणालिनी जांभळे यांची आरोपीशी व्यावसायिक ओळख होती.त्याने स्वतःला चित्रपट निर्माता आणि बिल्डर असल्याचे सांगितले होते.
डोंबिवलीतील प्रकल्पात गुंतवणूक केल्यास चांगला परतावा देण्याचे आश्वासन जाधवने दिले होते. वर्षभरात मूळ रक्कम परत देईन असेही सांगितले होते.
नोव्हेंबर 2019 ते फेब्रुवारी 2020 दरम्यान चेक आणि ऑनलाइन व्यवहारातून 47 लाखांची गुंतवणूक करण्यात आली.
सुरुवातीला जाधवने सुमारे साडेचार लाख रुपये परत केले. मात्र त्यानंतर त्याने परतावा देणे पूर्णपणे बंद केले.
पैसे मागितल्यावर आरोपीने मोबाईल नंबर आणि पत्ता बदलत राहिल्याचा आरोप आहे. नंतर “मी पैसे देणार नाही” असे उलट उत्तर दिल्याचे तक्रारदारांनी सांगितले.
26 फेब्रुवारी रोजी पोलिसांकडे तक्रार दाखल करण्यात आली. या प्रकरणाचा तपास सध्या पोलिसांकडून सुरू आहे.