Shruti Vilas Kadam
२ कप मखाना, अर्धा कप गूळ, पाव कप बदाम आणि काजू, २ चमचे तूप, अर्धा चमचा वेलची पूड, आवश्यकतेनुसार किसलेले खोबरे
सर्वप्रथम कढईत एक चमचा तूप गरम करा. त्यात मखाना घालून मंद आचेवर कुरकुरीत होईपर्यंत भाजून घ्या. मखाना थंड झाल्यानंतर हाताने दाबून पाहा. तो सहज तुटत असेल, तर व्यवस्थित भाजला आहे.
भाजलेले मखाने मिक्सरमध्ये घालून त्याची जाडसर पूड तयार करा. लाडूंना छान पोत मिळण्यासाठी सर्व मखाने अगदी बारीक करण्याची गरज नाही. आवडीनुसार काही मखाने थोडे जाडसर ठेवू शकता.
कढईत थोडे तूप घालून बदाम आणि काजू हलके भाजून घ्या. त्यानंतर त्यांचे बारीक तुकडे करा. सुकामेव्यामुळे लाडूंना छान चव आणि कुरकुरीतपणा येतो.
कढईत गूळ आणि थोडे पाणी घालून मंद आचेवर गरम करा. गूळ पूर्ण वितळल्यानंतर पाक गाळून घ्या. पाक जास्त घट्ट करू नका. लाडू वळण्यासाठी आवश्यक तेवढाच चिकटपणा ठेवा.
एका मोठ्या भांड्यात मखान्याची पूड, भाजलेला सुकामेवा, वेलची पूड आणि गूळाचा पाक एकत्र करा. मिश्रण व्यवस्थित हलवा. मिश्रण खूप कोरडे वाटल्यास थोडे वितळलेले तूप घालू शकता.
मिश्रण थोडे कोमट असतानाच हाताला थोडे तूप लावून गोल लाडू वळा. लाडू थंड झाल्यानंतर हवाबंद डब्यात ठेवा. अशा प्रकारे घरच्या घरी चविष्ट मखाना लाडू तयार होतील.