Shreya Maskar
हिवाळा सुरू झाला की घराघरांत पौष्टिक आणि चविष्ट पदार्थ बनवण्याची लगबग सुरू होते. कोकणातील खाद्यसंस्कृतीमध्ये तिळाला विशेष महत्त्व आहे. कोकणी पद्धतीची तिळाची चटणी कशी बनवावी, जाणून घेऊयात.
कोकण स्पेशल तिळाची चटणी बनवण्यासाठी पांढरे तीळ, लसूण, सुक्या लाल मिरच्या, सुक्या खोबऱ्याचा कीस, जिरे, मीठ, चिंचेचा कोळ आणि गूळ इत्यादी साहित्य लागते.
तिळाची चटणी बनवण्यासाठी सर्वप्रथम कढई गरम करून त्यामध्ये पांढरे तीळ घाला. मंद आचेवर तीळ हलके सोनेरी होईपर्यंत भाजून घ्या. तीळ भाजताना सतत हलवत राहा. ते जळणार नाहीत याची काळजी घ्या.
भाजलेले तीळ एका ताटात काढून थंड होण्यासाठी ठेवा. त्याच कढईमध्ये सुक्या खोबऱ्याचा कीस घालून हलका सोनेरी होईपर्यंत भाजून घ्या. त्यानंतर लसूण पाकळ्या, सुकी लाल मिरची आणि जिरे हलके भाजून घ्या.
भाजलेले तीळ, खोबरे, लसूण, मिरची आणि जिरे मिक्सरच्या भांड्यात घाला. त्यामध्ये चवीनुसार मीठ आणि आवडीनुसार थोडा गूळ किंवा चिंचेचा कोळ घाला.
सर्व साहित्य मिक्सरमध्ये घालून जाडसर वाटून घ्या. चटणी शक्यतो कोरडीच वाटावी. त्यामुळे तिची चव आणि पोत छान राहतो.
तयार झालेली चटणी एका स्वच्छ कोरड्या बरणीत काढा. गरमागरम भाकरी, भात किंवा पोळीसोबत सर्व्ह करा.
तीळ मंद आचेवर भाजा. जास्त भाजल्यास चटणी कडवट लागू शकते. चटणीमध्ये थोडासा गूळ घातल्यास तिखट आणि गोडसर चव यांचा छान समतोल साधला जातो.