Surabhi Jayashree Jagdish
हातांमध्ये दिसणारे काही बदल हे काही प्रकारच्या कॅन्सरचे सुरुवातीचे संकेत असू शकतात,अनेक वेळा त्वचा, नखे, बोटे किंवा तळहातांमध्ये होणारे असामान्य बदल शरीरात सुरू असलेल्या गंभीर आजारांकडे इशारा देऊ शकतात.
नखांचा रंग अचानक पिवळसर, तपकिरी किंवा काळपट होणं हे काही प्रकारच्या कॅन्सरशी संबंधित असू शकतं. काही रुग्णांमध्ये नखांवर काळी उभी रेघ दिसणं हे त्वचेच्या मेलानोमा कॅन्सरचं लक्षण असू शकतं.
हाताच्या बोटांच्या टोकांचा आकार गोल आणि फुगल्यासारखा दिसणं याला क्लबिंग म्हणतात. हे विशेषतः फुफ्फुसाच्या कॅन्सरसह काही हृदय आणि फुफ्फुसांच्या आजारांमध्ये आढळू शकतं. हे लक्षण दिसल्यास त्यामागील कारण शोधण्यासाठी वैद्यकीय तपासणी करणं आवश्यक असतं.
तळहात सतत लालसर दिसणं हे लिव्हरशी संबंधित काही गंभीर आजारांमध्ये दिसू शकतं. हे लक्षण दिसलं तर कॅन्सर असेलच असं नाही. डॉक्टरांच्या सल्ल्यानुसार आवश्यक रक्ततपासण्या आणि इतर चाचण्या कराव्यात.
हातावर जखम, व्रण किंवा गाठ दीर्घकाळ भरून येत नसेल तर त्याची तपासणी करणं गरजेचं आहे. विशेषतः गाठ सतत वाढत असेल किंवा तिचा रंग व आकार बदलत असेल तर त्वचेच्या कॅन्सरची शक्यता असते.
कोणतीही दुखापत न होता नखाखाली काळे डाग किंवा रक्तस्राव दिसणं हे असामान्य मानलं जातं. काही वेळा हे सबअंग्युअल मेलानोमा या दुर्मिळ त्वचेच्या कॅन्सरचं लक्षण असू शकतं. हा बदल सतत दिसत असल्यास तज्ज्ञांकडून तपासणी करून घेणं आवश्यक आहे.
हातांच्या त्वचेवर सतत खाज येणं, त्वचा जाड होणं किंवा वारंवार पुरळ येणं हे काही वेळा अंतर्गत कॅन्सरशी संबंधित त्वचेतील बदल असू शकतात. मात्र अशी लक्षणं ॲलर्जी, एक्झिमा किंवा इतर त्वचारोगांमुळेही दिसू शकतात.
एका हातात सतत सूज राहणं किंवा शिरा अचानक अधिक स्पष्ट दिसू लागणं हे काही प्रकारच्या कॅन्सरमुळे रक्तप्रवाहात अडथळा निर्माण झाल्याचं लक्षण असू शकतं. सूजेसोबत वेदना, वजन कमी होणे किंवा थकवा अशी इतर लक्षणंही असल्यास तपासणी करणं महत्त्वाचं आहे.
ही माहिती विविध सार्वजनिक स्रोतांवर आधारित असून केवळ सामान्य माहितीसाठी देण्यात आली आहे. या माहितीची स्वतंत्र वैद्यकीय पडताळणी आम्ही केलेली नाही. कोणतीही लक्षणे आढळल्यास स्वतः निष्कर्ष काढण्याऐवजी तज्ज्ञ डॉक्टरांचा सल्ला घ्या.