Surabhi Jayashree Jagdish
हार्ट अटॅक म्हणजे केवळ अचानक छातीत दुखणं किंवा व्यक्ती कोसळणंही इतकंच चित्र अनेकांच्या डोळ्यासमोर उभं राहतं. पण प्रत्यक्षात हृदयाशी संबंधित काही समस्या शरीरात अगदी शांतपणे वाढत असतात. अशावेळी हातांमध्ये दिसणारे काही बदलही तुमचं हृदय डॅमेज होत असल्याचा इशारा देत असतात, असं तज्ज्ञांचं म्हणणं आहे.
हात, बोटं किंवा घोट्यांमध्ये सतत सूज दिसत असेल तर ते शरीरात द्रव साचण्याचं लक्षण असू शकतं. अशी समस्या अनेकदा हृदय डॅमेज होण्याशी संबंधित असते. रक्ताभिसरण व्यवस्थित न झाल्यास शरीरात पाणी राहतं आणि सूज वाढू शकते.
हाताच्या किंवा पायाच्या बोटांचा रंग निळसर किंवा जांभळा दिसत असेल तर त्यामागे रक्तपुरवठा कमी झालेला असू शकतो. रक्तवाहिन्या अरुंद होणं किंवा हृदयातील इतर समस्यांमुळे असा बदल दिसू शकतो.
नखांखाली लहान लाल किंवा तपकिरी रेघांसारखे डाग दिसत असतील, तर ते एंडोकार्डायटिस नावाच्या संसर्गाचं लक्षण असू शकतं. हा संसर्ग हृदयाच्या आतील अस्तरावर होतो आणि वेळेवर उपचार न झाल्यास गंभीर ठरू शकतो.
काही लोकांमध्ये बोटांची टोके मोठी दिसू लागतात आणि नखं खाली वाकल्यासारखी दिसतात. याला क्लबिंग म्हटलं जातं. रक्तात ऑक्सिजनचं प्रमाण कमी झाल्यास अशी स्थिती निर्माण होऊ शकते.
हाताच्या किंवा पायाच्या बोटांवर लालसर किंवा जांभळ्या रंगाच्या दुखणाऱ्या गाठी दिसत असतील तर त्यांना ओस्लर नोड्स म्हटलं जातं. हे देखील हृदयाच्या संसर्गाशी संबंधित संकेत मानले जातात.
काही लोकांच्या नखांचा बहुतांश भाग पांढरट दिसतो आणि टोकाजवळ लालसर किंवा जांभळा पट्टा दिसतो. या स्थितीला टेरीज नेल्स म्हटलं जातं. हे हार्ट अटॅक किंवा मधुमेहाशी संबंधित असू शकतं.