Surabhi Jayashree Jagdish
ब्रेन ट्यूमर म्हटलं की अनेकांच्या डोळ्यांसमोर तीव्र डोकेदुखी, झटके अशी आपत्कालीन परिस्थिती उभी राहते. मात्र तज्ज्ञांच्या मते, सुरुवातीची लक्षणं अनेकदा सायलेंट दिसू शकतात.
दैनंदिन ताणतणाव, झोपेची कमतरता किंवा वाढत्या वयाचा परिणाम म्हणून दुर्लक्षित केली जातात. विशेषतः वागणूक आणि विचारांमध्ये होणारे बदल हे ब्रेन ट्यूमरचे सुरुवातीचं सायलेंट लक्षण असू शकतं.
ब्रेन ट्यूमरची सुरुवातीची लक्षणं अनेकदा शारीरिक नसून वागणूक आणि विचारसरणीशी संबंधित असू शकतात. व्यक्तीच्या स्वभावात किंवा निर्णय घेण्याच्या क्षमतेत हळूहळू बदल दिसू लागतात. त्यामुळे अनेकदा या बदलांकडे गंभीरपणे पाहिलं जात नाही.
पूर्वी शांत आणि आनंदी असलेली व्यक्ती अचानक जास्त चिडचिडी होऊ शकते. काही जण सामाजिक संपर्क टाळून स्वतःमध्येच राहू लागतात. कुटुंबातील सदस्यांना हा बदल सर्वप्रथम जाणवण्याची शक्यता असते.
लहानसहान गोष्टी वारंवार विसरणं हे एक महत्त्वाचं लक्षण ठरू शकतं. अपॉइंटमेंट, दैनंदिन कामं किंवा महत्त्वाच्या गोष्टी लक्षात ठेवण्यात अडचणी निर्माण होऊ शकतात. अनेकदा हा विसराळूपणा ताण किंवा वय वाढल्यामुळे झाल्याचा समज होतो.
कामाच्या ठिकाणी लक्ष केंद्रित करण्यात अडचण येऊ शकते. व्यक्तीला एखाद्या विषयावर दीर्घकाळ लक्ष ठेवणं कठीण जाऊ शकतं. त्यामुळे कामगिरीवर आणि दैनंदिन जीवनावर परिणाम होऊ शकतो.
पूर्वी सहज वाटणारी कामं पूर्ण करण्यासाठी अचानक जास्त प्रयत्न करावे लागू शकतात. ही लक्षणं हळूहळू वाढत असल्याने रुग्ण त्याकडे दुर्लक्ष करतात.